Hezkuntzak NAOn argitaratu du desgaitasunari lotutako premia bereziak dituzten ikasleen oporraldiko hezkuntza-jarduerak diru laguntzen deialdia. Berritasun gisa, aurten eskaera bat egingo da oporraldi bakoitzeko, eta ez bakarra orain arte egiten zen bezala, urtarrilean, apirilean eta irailean: urtarrilaren 9tik 20ra; apirilaren 17tik 28ra; eta irailaren 1etik 14ra.
Deialdia 70.000 eurokoa da, eta ikasleen garapen integralari laguntzen dioten eta ikasleen autonomia, bizi-kalitatea eta gizarteratzea hobetzen laguntzen duten aukera-berdintasuna eta hezkuntza-jardueretarako sarbidea lortzen laguntzea du helburu. Herri-administrazioek nahiz irabazi-asmorik gabeko erakundeek antolatutako jarduerak finantzatuko dira. Logopediako, psikoterapiako, psikomotrizitateko, fisioterapiako, optometriako edo bestelako banakako tratamenduak kanpoan geratuko dira.
Dirulaguntza hau jaso ahal izango dute 3 eta 21 urte bitarteko ikasleek, baldin eta eskolatuta badaude, Nafarroan bizi badira, desgaitasun-ziurtagiria badute edo EDUCAn erroldatuta badaude, desgaitasunari lotutako ardatza duten hezkuntza-premia bereziak dituztelako, edo diagnostiko-prozesu batean sartuta badaude, eta profesional batek jarduera horietan parte hartzeko beharra egiaztatzen badu.
Eskabidea bide telematikoz aurkeztu ahal izango da, www.navarra.es helbidean, eta aurrez aurre ohiko guneetan. Eskaera bakoitzaren balorazioan Gizarteratze Zerbitzuko, Orientazio Bulegoko eta CREENAko langileek parte hartuko dute.
