- Marian Elorza Kanpo Harremanetarako idazkari nagusiak, Amina Mohammed Nazio Batuetako alboko idazkari nagusiarekin batera, GJHen aplikazioari buruzko eztabaidan parte hartu du Eskualdeen Batzordean
- “2030 Agendak abstrakzio gutxiago eta zehaztasun gehiago behar ditu”
Marian Elorza Kanpo Harremanetarako idazkari nagusiak Eskualdeen Europako Batzordearen osoko bilkuran ari da parte hartzen egunotan Bruselan.
Oraingo honetan, Eusko Jaurlaritzaren ordezkariak Garapen Jasangarrirako Helburuen Aplikazioari buruzko eztabaidan hartu du parte, Amina Mohammed Nazio Batuetako alboko idazkari nagusi atxikiarekin batera, eta eskerrak eman dizkio Amina Mohammedi 2030 Tokiko Koalizioaren Idazkaritzak Euskadin duen egoitza globalari emandako laguntzagatik.
Marian Elorzak hitzaldia hasi du ziurtatuz Euskadik bat egiten duela 2030 Agendak proposatzen dituen filosofiarekin eta metodologiarekin. Izan ere, 2030 Agenda ibilbide-orri bat da garapen-eredu berri baterantz aurrera egiteko, bateragarri egingo dituena bateraezinak diruditen 3 dimentsio: hazkunde ekonomikoa, gizarteratzea eta ingurumenaren babesa.
Nazio Batuek behin eta berriz gonbidatu dituzte estatuz azpiko gobernuak 2030 Agenda “tokikotu” dezaten, bakoitzaren errealitatera egokituz. Gonbite hori dela eta, Elorzak Euskadi Basque Country 2030 Agenda aipatu du, eta Garapen Jasangarrirako Helburuen ezarpenean EAEk izandako esperientzia azaldu du.
Ondorio gisa, eta 2030erako zazpi urte falta direnean, Kanpo Harremanetarako idazkari nagusiak hiru mezu bidali nahi izan ditu: 2030 Agendak abstrakzio gutxiago eta zehaztasun gehiago behar ditu guztion aldetik; eskualdeetako eta tokiko gobernuek kezka adierazi behar diete estatuko gobernuei eta nazioarteko erakundeei GJHak behar bezala betetzen ez direlako; eta ezinbestekoa da ahaleginak hiru norabidetan areagotzea: tokikotze handiagorantz, maila anitzeko gobernantza gehiagorantz eta GJHekiko nazioarteko konpromiso handiagorantz.
Oraingoan, Eskualdeen Komiteak guztira 9 irizpen eta ebazpen bat bozkatu ditu. Gizarte-ekonomiarako ingurune egokia sortzea dela eta, Eusko Jaurlaritzak 10 zuzenketa aurkeztu ditu.
Zehazki, Eusko Jaurlaritzak gizarte-ekonomiako erakundeen ahalmena baliatzera animatzen du, zerbitzu publikoak garatu eta hobetzeko erakundeok zerbitzuon kudeaketan parte hartuz.
