Ekonomia eta Ogasun Sailak, Ekonomiako eta Europako Funtsetako Sailburuordetzaren bitartez, informazio-jardunaldi batzuekin jarraituko du ostegun eta ostiral honetan eskualdeko garapen-agentzietan. Horietan, Next Generation —SEM (Suspertze eta Erresilientzia Mekanismoa)— Europako funtsei buruzko informazioa eskainiko die eskualde bakoitzeko enpresa txiki eta ertainei, autonomoei eta udalei. Ekimen hau joan den asteazkenean hasi zen, Durangaldea – Lea Artibai eskualdeetan, eta maiatzaren hasiera aldean amaituko da Gipuzkoan.
Aste honetarako aurreikusitako topaketak Laudio-Amurrion (Laudio kasinoan, 10: 00etatik aurrera) izango dira, eta, ostiralean, Inguraldean, Meatzaldean, Ezkerraldean, Mungialdean eta Enkarterrin (BIC Bizkaian, Barakaldon, 09:30etik aurrera). Saio hauetan, Iñaki Barredo Ekonomiako eta Europako Funtsetako sailburuordea, Yurdana Burgoa Kabinete eta Koordinazioko burua eta Juan Alberdi Kohesio Politikaren eta Europako Funtsen zuzendaria arduratuko dira Eusko Jaurlaritzak duen informazioa emateaz jardunaldietara doazen pertsonei.
Topaketen egutegi honen helburua da enpresa handiei, ETE-ei, profesionalei eta autonomoei Europako funtsen inguruko informazioa helaraztea eta haietarako sarbidea erraztea, beren proiektuak finantzatzeko baliatu ahal izan ditzaten. Ekimen honen helburua da Europako laguntza horiek Euskadiko produkzio-sarean sartzea eta SEM – Suspertze eta Erresilientzia Mekanismoaren mamian jasotako eraldaketa ekonomikoa sustatzea. 2023a funtsezko ekitaldia da euskal produkzio-sareko eragile guztiek Europako baliabideak erakartzeko. Hortaz, informazioa eta prestakuntza ezinbestekotzat jotzen dira helburu hori lortzen laguntzeko.
Era berean, jardunaldi hauetan deialdi irekiak bertatik bertara ezagutzeko tresna digitalen berri ematen da, baita dirulaguntzak eta bestelako laguntzak jasotzeko aukera ere.
