Euskal Herriko Unibertsitateak maiatzaren 2an irekiko du Etengabeko Prestakuntzako graduondokoen aurrematrikulazio-epeia. Eskaintza horren bidez, unibertsitateak gizarte aldakor baten prestakuntza-beharrei erantzun nahi die. Orain arte Berezko Masterrak eta Graduondokoak izenez ezagutuak, prestakuntza mota horrek behar honi erantzuten dio: bizialdi osoko prestakuntzan ezagutza eguneratzeko beharrari, eta, bereziki, erakundeetan eta enpresa-munduan etengabe berritzeko beharrari, langileek beren ezagutzak, trebetasunak eta gaitasunak eguneratu behar baitituzte errealitate profesional berrietara egokitzeko.
Horretarako, UPV/EHUk iraupen laburreko formatuko prestakuntzak eskaintzen ditu ikasturtean, eta, haien ezaugarrien arabera, unibertsitatekoak zein unibertsitatekoak ez direnak (guztira, 1.500 pertsona joan den ikasturtean) sar daitezke. Era berean, Etengabeko Prestakuntzako graduondoko tituluak eskaintzen dira jakintza-arlo guztietan, unibertsitateko titulazioa duten ikasleentzat soilik (batez beste, 1.000 ikasle ikasturte bakoitzeko), eta, zehazki, 121 tituluk irekiko dute aurrematrikulazioa datorren astean 2023-2024 ikasturterako.
«Etengabeko Prestakuntzak tradizio handia du unibertsitate honetan», azaldu du Montse Maritxalar Graduondokoaren eta Etengabeko Prestakuntzaren arloko errektoreordeak; izan ere, 30 urtetik gorako ibilbide arrakastatsua duten graduondoak ditugu, hala nola Marketin eta Merkataritza Zuzendaritza Masterra, bai eta oraintsuko eta gaurkotasun eta eskaera handiko beste batzuk ere, hala nola Enpresari Aplikatutako Ekonomia Zirkularreko Masterra. Unibertsitateko irakaskuntzei buruzko Errege Dekretuak aukera eman digu irakaskuntza mota horien gure katalogoa egokitzeko eta irakaskuntza horien eskaintza eta ezaugarriak zabaltzeko, kolektibo berriei ere irekiz”.
Alde horretatik, Maritxalarrek adierazi du ikastaro eta graduondoko horiekin “gradu-, master- eta doktorego-eskaintza akademiko lineal tradizionalaren prestakuntza-ikuspegia baino haratago goazela, eta ikuspegi zirkularra bultzatzen dugula, non pertsona etengabe trebatzen den bere bizitza profesionalean zehar. Horregatik, gure esparrua zabaltzen dugu, lan-karreran zehar bizitza profesionalera egokitzen den etengabeko prestakuntza aurkeztuz, enpresetan sortzen diren premia berriei erantzuteko ezagutzak, trebetasunak eta gaitasunak eguneratzeko aukera emanez. Horrek birkualifikazio profesionala lortzen lagunduko du, eta horrekin pertsonak lan-merkatuan mantendu ahal izango dira edo lan-merkatuan sartu ahal izango dira eskuratutako gaitasun berriekin”.
Etengabeko Prestakuntzako Master ezagunez gain (60 eta 120 kreditu bitartekoak), Euskal Herriko Unibertsitateak iraupen desberdineko beste ikastaro modular batzuk eskaintzen ditu, titulu desberdinetarako sarbidea ematen dutenak eta, lortu ondoren, adar bereko prestakuntza zabalagoak egiteko aukera ematen dutenak. Adibidez, unibertsitate-espezializazioko tituluak (30-59 kreditu) eta unibertsitate-aditu tituluak (15-29 kreditu) unibertsitate-tituludunentzat, eta unibertsitate-hedapeneko diplomak (60 kreditu arte) biztanle guztientzat.
Eskariaren araberako prestakuntza, unibertsitarioentzat eta unibertsitarioak ez direnentzat
UPV/EHUk Unibertsitate hedakuntzako ikastaroen katalogo bat du. Ikastaro horiek 60 kreditu baino gutxiago irauten dute, eta batzuk unibertsitateko titulurik ez duten pertsonei irekita daude. Nabarmentzekoa da neurrira sortutako Azpimarratzekoa da ikastaro horietako batzuen aldakortasuna: neurrira sortutakoak dira eta enpresa edo erakunde jakin baten beharretara egokitzen dira, langileek alderdi jakin batzuetan dituzten ezagutzak eguneratu behar baitituzte. Errektoreordeak adierazi duen bezala, “Eusko Jaurlaritzako Osasun Sailarekin eta antzeko erakunde publikoekin dugun lankidetzaren kasua da. Erakunde horiekin prestakuntza espezifikoak egiten ditugu beren langileentzat. Horren adibide da joan den irailean 12 osasun-teknikariri emandako Epidemiologia eta Demografia ikastaroa, edo sendagaiak banatzeko baimena lortzeko ikastaroa, kasu horretan erakunde horretakoak ez diren pertsonei ere irekia”.
Prestakuntza-ildo berri bat ere dago, Maritxalarrek azaldu duenez. “Abian jartzen ari garen proposamen eta ekimen berrietara irekita dago. ‘Mikroegiaztagiriak’ izeneko atal batean kokatuko da; prestakuntza-mota horrek 15 kreditu baino gutxiagoko iraupena izango du, eta profesionalen espezializazioa eta birkualifikazioa lortzera bideratuta egongo da. Egia esan, gaur egun baditugu horrelako ikastaroak; esaterako, tanke-ontzien (petrolio-ontziak, kimika-ontziak eta gasontziak) karga-eragiketen ziurtagiria lortzeko ematen dugun prestakuntza, FOM/2296/2002 Aginduak arautzen duena. Prestakuntza hori nahitaezkoa da merkataritza-ontzi mota horretan nabigatu nahi duen zubiko edo makina edozein ofizialentzat”.
Euskal Herriko Unibertsitateak aukera ematen die Lanbide Heziketako hainbat titulazio lortu dituzten profesionalei Lanbide Heziketako Irakasle Teknikoen Unibertsitate Hedapeneko Diploma egiteko. Diploma horrek lanbideheziketa arautuan irakasteko gaitzen ditu, besteak beste, Ile-apainketa edo Soldadura jakintza-arloetan.
Unibasq-ek egiaztatutako kalitatea
UPV/EHUko Etengabeko Prestakuntzako irakaskuntza guztiek kalitatea bermatzeko sistema dute. Nabarmentzekoa da Euskal Herriko Unibertsitatea da bere etengabeko prestakuntzako masterren eskaintza Unibertsitate Sistemaren Kalitate Agentzia baten kanpo-kontrastearen mende jartzen duen erakunde bakarra, hain zuzen ere Unibasq-en mende.
Etengabeko Prestakuntzaren eskaintzari buruzko informazio gehiago nahi izanez gero:
– Etengabeko Prestakuntzako Masterra
– Unibertsitate Espezializazioa
– Unibertsitateko Aditua
– Unibertsitate Hedakuntzako Diploma
– Unibertsitate Hedakuntzako Diploma (graduari lotua)
Etengabeko Prestakuntzako Masterren eta Berezko Graduondokoen aurreinskripzioari buruzko informazio gehiago (maiatzaren 2tik aurrera).
