Eusko Jaurlaritzako Ekonomiaren Garapen, Iraunkortasun eta Ingurumen Sailak, SPRIk eta Innobasquek bultzatutako Hazinnova programak berrikuntza ez-teknologikoari buruzko doako aholkularitza-zerbitzua eskaintzen die enpresa txiki eta ertainei, lehiakortasuna bultza dezaten.
Bilbo Handia, Uribe Kosta, Arratia-Nerbioi eta Enkarterri eskualdeetako 116 enpresak jaso dute gaur goizean Hazinnova enpresa berritzaile gisa, Eusko Jaurlaritzako Ekonomiaren Garapen, Iraunkortasun eta Ingurumen Sailaren, SPRIren eta Innobasque Berrikuntzaren Euskal Agentziaren eskutik, BIC BIzkaia Ezkerraldean egindako ekitaldian. Beren erakundeetan berrikuntza ez-teknologikoko mikroproiektuak ezarri dituzten enpresak dira, merkatuan duten posizioa hobetzeko.
Sari hori emateko ekitaldian Barakaldoko alkate Amaia del Campo izan da, eta nabarmendu du «berrikuntza oso garrantzitsua dela zuen enpresa-proiektuen etorkizuna bermatzen duen tresna gisa». Eusko Jaurlaritzako Teknologia, Berrikuntza eta Eraldaketa Digitaleko sailburuorde Estibaliz Hernáez, Eusko Jaurlaritzako Teknologia eta Berrikuntzako zuzendari Alberto Fernández eta Berrikuntzaren Euskal Agentziako presidente Manuel Salaverria ere bertan izan dira.
Barakaldon egindako jardunaldi hau EAEko hainbat eskualdetan egindako bost topaketen zirkuituko lehena da. Bertan, euskal 321 enpresa txiki eta ertainek berrikuntzaren euskal ekosisteman sartzeko egindako ahalegina aitortuko da.
Topaketa honetan, ETEekin batera, sareko eragileen ordezkariak egon dira, zeinek bere berrikuntza-mikroproiektuak garatzeko eta ezartzeko prozesuan lagundu baitie: BIC Bizkaia Ezkerraldea, Inguralde, Aclima, AFM, Behargintza Txorierri, Bizkaiko Merkataritza Ganbera, Elikadura Klusterra, Energia Klusterra, Mugikortasun eta Logistika Klusterra, Enkartur, Errota Fundazioa, Metaleko Enpresen Bizkaiko Federazioa – FVEM, Gorbeialde, Arrantzako Tokiko Ekintza Taldea (GALP), Euskadi Habic ekipamenduaren, altzarien eta diseinuaren klusterra, Hegan, Euskadiko Kooperatiben Konfederazioa, Meatzaldeko Behargintza, Mendinet Landa Garapenaren Aurrerabiderako Elkartea, Mungialdeko Behargintza eta Uniport.
Gaur aintzatespena jaso duten Bilbo Handia, Uribe Kosta, Arratia-Nerbioi eta Enkarterriko enpresa txiki eta ertainek 149 proiektu osatu dituzte Hazinnova 2022 deialdiaren bidez. Berrikuntzak dira, bai produktuan, bai negozio-prozesuetan, fabrikazioan, logistikan, merkaturatzean, administrazioan edo finantzetan.
Ziurtagiriak emateaz gain, jardunaldian zehar berrikuntzako kasu praktikoen aurkezpena egin da. Bertan, Hazinnova 2022 programari heldu zioten enpresetako hiruk – Jabones El Abra, Luse Ingeniería eta Gesklima – beren esperientzia praktikoak eta lortutako emaitzak partekatu dituzte.
Barakaldoko topaketaren ondoren, beste 60 enpresak Hazinnova ziurtagiria jasoko dute ekainaren 19an Ermuko Izarra Centerren egingo den ekitaldian. Hazinnova 2023 deialdia zabalik dago eta interesa duten enpresa berriek urriaren 26ra arte eskatu ahal izango dituzte laguntzak. Programak 2,7 milioi euroko aurrekontua du esleituta aurten.
