- EAEko biztanleen % 6,3 desgaitasun-egoeran bizi dira
- Nerea Melgosa Berdintasun, Justizia eta Gizarte Politiketako sailburuak Euskadin desgaitasuna duten pertsonentzako bizitza independentearen ereduaren oinarriak ezartzeko diagnostikoa aurkeztu du Gasteizen
- “Errealitate hori ezin dugu eta ez dugu ahaztu nahi. Nahitaezkoa da pertsona horientzat bizimodu independentearen oinarriak finkatzen jarraitzea”, esan du Melgosak
- Gizonezkoa, 65 urtetik gorakoa, % 65etik beherako ezgaitasuna duena, ezgaitasun egoeran dagoen pertsonaren profil nagusia da
Eusko Jaurlaritzako Berdintasun, Justizia eta Gizarte Politiketako sailburu Nerea Melgosak inauguratu du gaur goizean Euskadin desgaitasuna duten pertsonentzako bizimodu independentearen eredurantz jardunaldia, Eusko Jaurlaritzako Gizarte Zerbitzuen Zuzendaritzak eta Euskadiko Elkarrizketa Zibilerako Mahaiko Desgaitasun Batzordeak antolatuta, administrazioak, sailak eta gizarte-erakundeak biltzeko, EAEn bizimodu independentearen eredua bultzatzeko.
Inaugurazioan, Euskadin desgaitasun-egoeran dauden pertsonentzako bizimodu independentearen ereduaren oinarriak ezartzeko egindako Diagnostikoa dokumentua aurkeztu du Melgosak. Dokumentu hori Euskadiko hirugarren sektoreko erakundeetako, foru-aldundietako eta Nafarroako Gobernuko beste sail batzuetako ordezkariek egin dute, 2021etik 2022ra bitartean.
Hitzaldian, sailburuak esku-hartze eta prebentzio eraginkorraren beharra azpimarratu du: “Ikusmirak Gizarte Politiken Behatokiaren datuen arabera, 77.000 gizon eta 61.000 emakume baino gehiago bizi dira desgaitasun-egoeran EAEn. Euskal biztanleriaren % 6,3. Errealitate hori ezin dugu alde batera utzi, eta ez dugu alde batera utzi nahi”, esan du Melgosak.
Sailburuak azpimarratu du beharrezkoa dela “pertsona horientzako bizimodu independentearen ereduaren oinarriak finkatzen jarraitzea, azpiegiturak, garraio-sistemak, zerbitzu publikoak eta pribatuak eta jarrera sozialak birformulatuz, inklusiboak izan daitezen”.
Gaur aurkeztutako diagnostikoak, besteak beste, desgaitasun-egoeran dauden pertsonen lan-egoera islatzen du, langabezia-tasa % 16,5ekoa baita, biztanleria orokorrarena baino askoz handiagoa.
Desgaitasun-egoeran dauden pertsonek aurre egin behar dieten desberdintasunen aurka borrokatzeko, Melgosak gogorarazi du “bizimodu independentearen euskal ereduak desgaitasuna duten pertsonak jartzen dituela erdigunean, haien eskubideak eta gaitasunak aitortuz, autodeterminazioa eta ahalduntzea sustatuz eta haien enplegagarritasuna indartuz”.
Ildo beretik, Nerea Melgosak pertsona guztiek «duintasunez eta autonomiaz bizitzeko eta gure gizartearen parte aktiboa izateko” duten eskubidea aldarrikatu du, “familia zaintzaileek ere beren bizitza aurrera eramateko eskubidea dutela” gogoraraziz. Egoera hori «bereziki emakumeei, gure gizarteko zaintzaile handiei» dagokien egoera da.
Melgosak berretsi egin du Eusko Jaurlaritzak “errespetuan, aukera-berdintasunean eta diskriminaziorik ezan oinarritutako eredu bat eraikitzen jarraitzeko konpromisoa, bizitza independente eta inklusiborako baldintzak lortzera bideratutako politikak diseinatuz eta bultzatuz”.
Amaieran, Nerea Melgosak gogorarazi duenez, “helburua da hitzak ekintza zehatz bihurtzea, ezgaitasunak dituztenei zuzenean mesede egiteko”.
“Pertsona guztioklortu nahi dugu gauza bera: bizitza osoa eta autonomoa. Baina mendekotasun egoeran dauden pertsonen autonomiak eta independentziak administrazio publikoen, gizarte-erakundeen eta herritarren laguntza behar du entzuteko, ulertzeko eta jarduteko”, ondorioztatu du Nerea Melgosak.
Diagnostikoaren laburpena: https://labur.eus/wZsDZ [pdf]
