Bi exekutiboek irailean lortu zuten akordioa Aldebiko Batzordean, eta eskumen-desadostasunak konponduta utzi zituzten
Gobernu Kontseiluak baimena eman du Eusko Jaurlaritzak atzera egin dezan Espainiako Gobernuaren urtarrilaren 24ko HFP/55/2023 Aginduaren aurkako eskumen-gatazka positiboan. Agindu hori Berreskuratze, Eraldatze eta Erresilientzia Plana gauzatzen duten prozeduretan interes gatazkaren arriskua sistematikoki aztertzeari buruzkoa da. Bi gobernuek, Estatuaren eta Euskadiren arteko Aldebiko Lankidetza Batzordean akordio bat lortu eta Estatuaren Aurrekontu Orokorrei buruzko 31/2022 Legearekiko eskumen desadostasunak ebatzi ondoren eman da ukoa. Lege hori da, hain zuzen ere, dagokion Aginduaren garapen-esparrua.
Espainiako Gobernuak Zerga Administrazioko Estatu Agentziaren (ZAEA) aplikazio bat ezarri nahi zion Euskal Autonomia Erkidegoari, dirulaguntzak eta kontratuak izapidetzean interes gatazkak izateko arriskua aztertzeko. Gobernantza Publiko eta Autogobernu Sailaren ustez, Minerva izeneko tresna informatiko horrekin urratu izango ziren euskal eskumenak, Estatuak inposatu egiten baitzituen.
Irailean Bitariko Batzordean lortutako eta 2023ko urriaren 10ean argitaratutako akordioaren ondoren, Minerva tresna informatikoa Berreskuratze, Eraldaketa eta Erresilientzia programetatik eratorritako administrazio eta dirulaguntza prozeduretan baino ez da erabiliko. Prozedura hori 2023rako Estatuko Aurrekontu Orokorrei buruzko abenduaren 23ko 31/2022 Legearen ehun eta hamabigarren xedapen gehigarrian arautzen da, eta aipatutako Aginduan garatzen da. Eta hori guztia Konstituzioaren 1. xedapen gehigarria errespetatuz eta aplikazio informatikoa erabiltzeko baldintzak adostuko dituen hitzarmen bat ezartzearen baldintzapean.
