Atzo gauean Londresko Spencer Housen egindako ekitaldian, Eusko Jaurlaritzak Catalyst 2030 nazioarteko saria jaso zuen, eskualdeetako gobernuentzako sarien kategorian. Estatuko gobernuen modalitatean, Kanadako Gobernu Federalak jaso zuen saria.
Lehenengo fasean, Eusko Jaurlaritza 79 hautagaitzako azken lau finalisten artean izendatu zuten. Beste hiru finalistak Prospero Portland, Oregón, AEB, PEBEC, Nigeria eta AECT, Duero-Douro, Espainia eta Portugal, Lurralde Lankidetzako Europako Taldea izan ziren.
Atzo egindako ekitaldian, honako erakunde hauek ere saritu zituzten sariak: EY, korporazio globalen kategorian; Nazio Batuen Munduko Turismo Erakundea (OMT), aldebikoen eta aldeaniztunen kategorian; edo Instituto Humanitas 360 (Brasil), Fundación Tarsadia (AEB), Fundación Asfari (Erresuma Batua) edo Segal Family Foundation (AEB), emaileen kategoriaren barruko modalitate desberdinetan. Aitorpen berezia jaso zuten Ekonomia Sozial eta Solidarioari buruzko Nazio Batuen Erakundearteko Lantaldeak (UNTFSSE), Samantha Power, USAID eta Warby Parker-ek.
Saria emateko unean, epaimahaiaren azalpenak nabarmendu zuen Eusko Jaurlaritzak etengabe egiten duela ekarpena trantsizio sozialaren eta 2030 Agendaren arloko berrikuntza sozialaren proposamenak egiteko. 2030 Agendako Lehentasunen Euskal Programa, Eusko Jaurlaritzak legegintzaldi honetarako GJHen arloan duen jarduera-plana osatzen duen tresna, berariaz aipatu zen, bai 2030 Agendaren inguruan sailen eta erakundeen arteko ekintza bateratua eta koordinatua bateratzeagatik, bai jarraipen- eta ebaluazio-tresna zehatzak biltzeagatik.
Saria eman izanaren berri izan ondoren, Eusko Jaurlaritzako Trantsizio Sozialaren eta 2030 Agendaren idazkari nagusi Jonan Fernandezek eskerrak eman dizkie bai Catalyst 2030 erakundeari bai epaimahaikideei. Azpimarratu duenez, «sari honek eta Nazio Batuen Local 2030 Tokiko Koalizioaren munduko egoitza Euskadin irekitzeak Euskadik eta bere erakundeek giza garapen jasangarriari dagokionez hartutako konpromisoa aitortzen dute».
«2030 Agendaren arloan eta nazioartean —adierazi du Fernandezek— Eusko Jaurlaritzak erreferentzia-jarrera du estatuz kanpoko gobernuen artean. Eskualde-lidergo horren nazioarteko aintzatespena GJHen sustapen- eta gobernantza-eredu batek markatzen du, eta hiru helbururi erantzuten die: 2030 Agenda gehiago instituzionalizatzea, Garapen Jasangarrirako Helburuen sustapena konprometitzen duten azpiegiturekin; sozializazio handiagoa, 2030 Agendaren dibulgazio-estrategiekin; eta pertsonalizazio handiagoa, GJHak banaka interpelatzen gaituen kontratu sozial berri gisa planteatuz».
Emily Kasriel kazetari ospetsuak eta Ruma Bose Clearcoko egile ekintzaile eta hazkunde-zuzendariak gidatu zuten sariak emateko ekitaldia. Ongietorri-hitzaldian, Jeroo Billimoriak, Catalyst 2030 erakundearen sortzaileetako batek, finalista guztien meritua aitortu zuen, eta zoriondu zituen, «aktiboki parte hartzen dutelako gizarte-berritzaileen lanak mundu osoan duen eragina bizkortzen. Hau bere ikuspegiaren, konpromisoaren, arrakastaren eta babesten dituen komunitateetan duen eraginaren ospakizuna da».
Catalyst materialki irudikatzen duen obra Indiako artisau-komunitateko kideek diseinatu dute, eta Sourmandal izena du. Eguzki-sisteman oinarritzen da, eta iradokitzen du komunitate globalak antzeko konfigurazioa behar duela, energia-foku berriztagarriarekin eta artikulazio harmoniatsuarekin. 2030 Agendak eta GJHek sistema hori eratzen laguntzen dute.
Catalyst 2030 Nazio Batuen 2030erako GJHen aurrerapenarekin konprometitutako pertsonen eta erakundeen mugimendu global ospetsua da. Ekintzailetza eta berrikuntza soziala sustatzen duten erakundeek eta pertsonek zuzentzen dute, pertsonen eta planetaren aldeko ekintzarako dei global bati erantzunez.
2019an, ekintzaile sozialen eta erakunde laguntzaileen talde batek sortu zuen, besteak beste, Ashoka, Echoing Green, Munduko Foro Ekonomikoaren Schwab Fundazioa eta Skoll Fundazioa. 2020ko urtarrilean, bultzada handia jaso zuen Davosko Munduko Foro Ekonomikoan.
Oro har, Catalyst 2030 sariek GJHen arloan eta ekosistema globalaren eraldaketa sozialerako, ekonomikorako eta ekologikorako lankidetza sortzaile partekatua modu eraginkorrenean bultzatzen ari diren erakundeak saritzen dituzte.
