Turismo, Merkataritza eta Kontsumoko sailburu Javier Hurtadok Arabako Errioxako XIII. Enoturismo Foroaren inaugurazioan parte hartu du gaur. Ekitaldian, sailburuak gogorarazi du turismoaren, ostalaritzaren eta merkataritzaren sektoreak eraldaketa digitalera, ingurumenekora eta sozioekonomikora egokitu behar izan direla, eta horrek etorkizunari buruzko galdera garrantzitsuak egitea ekarri duela, baita etorkizunera nola bideratu nahi dugun ere.
“Foro honetan aztertuko dena da non gauden, nora goazen eta zergatik. Arabako Errioxa, Ardoaren Ibilbidearen bidez, kuadrillen bidez eta administrazioen laguntzarekin, aspalditik ari da enoturismoaren etorkizunerako bilakaera-bide horretan aurrera egiteko lanean. Next Generation funtsenak bezalako aukerak baliatzen jakin du eraldatzeko, adibidez, 2022an Enogastronomiako Turismo Plan Nazionalean sartzen zen enoturismo proiektuari esker, 5,5 milioiko zuzkidurarekin lurraldearentzat. Jasangarritasunean erreferentea den helmuga enogastronomiko bateranzko eraldaketa bizkortzera bideratutako proiektua, eskaintza pausatuagoa, orekatuagoa eta zirkularragoa duena, ingurunearekin eta tokiko garapenarekin konprometitua”.
Sailburuak azpimarratu du proiektu honek eta Arabako Errioxatik planteatzen diren beste batzuek helburu bera dutela Euskadiko turismo-ereduarekin, jasangarritasuna sustatzen baitu bere hiru alderdietan: ingurumenean, gizarte eta kulturan eta ekonomian. “Hau da, irabaziek ondorioak ekartzea tokiko garapenean, eta horrek gero eta garrantzi handiagoa hartzen du turismoa ekonomiaren trakzio-elementu gisa hartuta. Aurten, urtarriletik irailera, Arabako Errioxan % 3 igo dira gaualdiak, eta hazkunde eutsia eta jasangarria izan da”.
Ildo horretan, sailburuak azpimarratu nahi izan du enogastronomia jasangarritasun-osagai garrantzitsua dela turismoarentzat. “Enogastronomiak desestazionalizatzen eta bisitariak Euskadi osoan banatzen laguntzen du. Baina, bestetik, eskaintza lehiakorretatik bereiztea dakar eta kalitatezko eskaintza osagarri bat da, aisiako edo negozioetako beste edozein motibazio nagusi duten bisitarientzat”.
