Gobernu Kontseiluak gaurko bileran onartu du, Hezkuntza sailburuaren proposamenez, 2024-2025 ikasturtean Cambridgeko Unibertsitateko Clare Hall Collegen egonaldiak egingo dituzten ikertzaile bisitarientzat dirulaguntzak arautzen dituen Agindua. Deialdi honek 94.450 euroko kopurua du.
Mugikortasun programa hau bi modalitatetan eskaintzen da (Visiting Fellow eta Post Visiting Fellow), guztira hiru egonaldirekin. Egonaldiaren iraupena, modalitatearen arabera, honako hau da:
– Visiting Fellow: egonaldi bat, bederatzi hilabetekoa gehienez; hala ere, hautagaiek egonaldi laburragoak egin ahal izango dituzte, baina inoiz ez lau hilabete eta erdi baino gutxiagokoak.
– Post Visiting Fellow: bi egonaldi, gehienez bi hilabetekoak; hala ere, hautagaiek egonaldi laburragoak egin ahal izango dituzte, baina inoiz ez bi aste baino gutxiagokoak. Modalitate hau deialdi honen aurretik Clare Halleko (Life members) Visiting Fellow izan diren ikertzaile doktoreei zuzenduta dago.
2024-2025 ikasturteko egonaldietarako laguntzaren zuzkidura honako hau da: Visiting Fellow modalitatean, 64.850 euro 9 hilabeteko egonaldirako; eta Post Visiting Fellow modalitatean 29.600 euro bi hilabeteko bi egonalditarako.
Deialdi honetara aurkeztu ahal izateko izangaiek egoitza Euskadin eta doktore titulua izan beharko dituzte, eta Cambridgeko Unibertsitateko sail edo fakultateren batean onartuak izan beharko dute. Gainera, lehen egunetik lanean hasi ahal izateko eta unibertsitate-komunitatearekin elkarbizitzeko adinako ingeles maila eduki beharko dute.
Hezkuntza Sailak eta Cambridgeko Clare Hall ikasketa-zentroak sinatutako hitzarmen berriaren arabera, ikerketaren edozein alorretatik datozen ikertzaileek eskatu ahal izango dituzte egonaldi hauek.
Izangaia aukeratzeko prozesuak bi fase izango ditu. Lehen fasean hautaketa batzordeak izangaiaren honako alderdiok baloratu eta puntuatuko ditu: curriculum akademiko eta zientifikoa (argitalpenak, ponentziak, zuzendu dituen ikerketa-proiektu edo tesiak, graduko nahiz gradu ondoko irakasle jarduera), ikerketa proiektua, eta izangaiaren disponibilitatea. Bigarren fasea elkarrizketa izango da, non izangaiak bere proiektua aurkeztu beharko duen, ingelesez.
Hautaketa batzordeak Visiting Fellow modalitaterako aukeraturiko pertsonak Clare Hall Colegen urte osoan egoteko modurik ez balu (9 hilabetez) eta lau hilabete eta erdiko egonaldiaren aldeko hautua egingo balu, haren ondoren puntuaziorik altuena lortu duen pertsonari eskainiko litzaioke gainerako lau hilabete eta erdiko egonaldia egiteko aukera, bederatzi hilabeteak osatu arte.
1966an sortua, Cambridge-ko Unibertsitateko ikasketa aurreratuko ikastetxea da Clare Hall College. Gero eta ikertzaile bisitari gehiago hartzen dituen programa eskaintzen du, hau da, munduko herrialde guztietako akademikoak biltzen ditu, eta ikertzaile horiek Cambridgen bertan bizi eta lan egiten dute bederatzi hilabetez, gehienez ere. Cambridgek bost ikastetxe ditu gradu-ondoko ikasleentzat eta horietako bat da Clare Hall. Bertan Euskadiko ikertzaile bisitari bat izatea, Euskadirekin zerikusia duten gaietan espezializatua hain zuzen ere, oso lagungarria gertatzen da Euskadi gero eta ezagunago izan dadin nazioarteko eremuan.
