Bilbao Exhibition Centrek 156 milioi euro baino gehiagoko BPGarekiko inpaktu ekonomikoa sortu zuen 2023an antolatutako 224 ekitaldiei esker. Negozio-lerroen arabera, 34 Azokak eta Erakusketak izan dira; 164 Batzarrak, eta 26 Bizkaia Arenarekin lotutakoak. Zalantzarik gabe, jarduera handiko urtea izan da BECentzat. Guztira, 902.741 bisitari jaso ditu eta barrutia 315 egunez egon da okupatuta. Jarduera-indize horren ondorioz, Euskadiko ogasunentzat zergatan bildutako dirua 29,9 milioi euro baino gehiagokoa izan da eta 3.053 enplegu sortu dira.
Horrez gain, txostenak erakusten du sortutako gastuaren % 70 azokaz kanpoko jardueretan berriro inbertitu zela; hala nola ostalaritzarako (% 34 jaso zuen), garraiorako (% 23); aisialdiko eta kultura arloko jardueratarako (% 11) eta txikizkako merkataritzarako (% 2). Datu horiek agerian uzten dute BEC liderra dela Euskadiren nazioarteko proiekziorako eta garapen sozioekonomikoa bultzatzeko ekitaldiak antolatzen eta erakartzen.
Azoka eta Erakusketen arloan, BECek hitzordu enblematiko batzuk jaso zituen berriro eta proposamen berritzaileak gehitu zituen, 2.705 enpresa erakusketari bilduz. +INDUSTRY oso garrantzitsua izan zen egutegian. Negozio-foro horretan, beren sektoreetan erreferentziazkoak diren hainbat azoka industrial aldi berean egin ziren: ADDITꜪD, BeDIGITAL, Maintenance, Pumps&Valves, Subcontratación eta WORKinn. Gainera, erakusketa profesionalen programazioari dagokionez, azpimarragarriak dira ondorengo hitzorduak: Steel Tech; World Maritime Week; Basque Open Industry; Empack y Logistics & Automation Bilbao; Euskoener; Expocadena; Food4Future eta Intergraf.
Aldi berean, gainera, BECek publiko orokorrarentzako agenda osoa eskaini zuen, era hauetako proposamenekin: Umeen Gabonetako Parkea; Tendencias Creativas; Outlet Azoka; Japan Weekend; Desembalaje; Expovacaciones; FVO-Bigarren Eskuko Ibilgailuen Azoka; Euskal Encounter; Biocultura; Celebra! eta Retroclásica Bilbao.
Bestalde, BEC Batzarrak ekitaldi ugari bildu zituen, neurri handi batean negozioen turismoak azken urteotan izandako gorakada handiari esker. Formatuen zerrenda urtez urte handitzen ari da: kongresuak, erakusketak eta batzarrak, enpresa-bilerak, zinematografiako ekoizpenak eta oposizioak… 2023an, bereziki nabarmendu beharreko ekitaldiak izan dira hauek: Mundu Bankuaren Innovate4Climate; Iberquimia; SME Assembly; EEN Annual Conference; Hidrogenoaren Euskal Korridorearen bilerak, “El Hoyo” filmaren bigarren zatiaren filmaketa; Hyrox kirol-proba eta Frantziako Tourraren Grand Départeko logistikako eta prentsako zentroa.
Ikuskizunei dagokienez, Estatuko eta nazioarteko musikagintzako talde entzutetsuenen birak jaso zituen Bizkaia Arenak, eta salmentei dagokienez errekorreko zifrak lortu zituen: egindako 26 ekitaldietatik, 17tan sarrera guztiak agortu ziren. Ekitaldi horietan bildutako entzule kopurua
265.000 zaletukoa baino gehiagokoa izan zen Iron Maiden, Sabina eta Aitanaren kontzertuetan eta I Love Reggaeton, Love The 90s edo Yo Fui a EGB jaialdietan, adibidez. Emanaldi haietan guztietan, beren musika-erreferenteek zuzenean ikusteko aukera izan zuten bertaratu zirenek. Gainera, Euskal Herriko beste hitzordu kultura batzuek ere beren tartea izan zuten: Ura Bere Bidean, ZEID Fest edo Euskalgym.
210.600 jarraitzaile baino gehiagoko komunitate sutsu bat (2022an baino % 9 handiagoa) BECeko sare sozialetako kanal ugarietan aktibo egon zen. Izan ere, sare sozialetan egindako interakzioak 230.600 baino gehiago izan ziren; webguneek (korporatiboek zein ekitaldiekin lotutakoek), 1.850.000 bisitako eta ikusitako 4 milioi orrialdeko kopurua gainditu zuten.
2023ra begira, BECen ikuspegi estrategikoarekin lotutako funtsezko elementuak izango dira hauek: eraldaketa digitalarekin jarraitzea, erabiltzaileentzako esperientzia bikaina bermatzea eta tokiko eta mundu mailako ingurunearen jasangarritasuna lortzen laguntzea. Hain zuzen ere, azken puntu hori lortzeko, 9 ardatzetan antolatutako ibilbide-orria prestatu du BECek: energia, hondakinak, mugikortasuna, berdintasuna, ESK, digitalizazioa, legatua, hornitzaileak eta sentsibilizazioa. Ikuspegi horrekin bat eginez, BECek ingurumen-aztarna gutxitzeko neurri zehatzak ezarri ditu eta, horien artean, azpimarratu beharrekoa da orain gutxi eguzki-planta fotovoltaikoa handitu duela. Horretarako, energia elektrikoa sortzen duten 1.800 plaka berri gehitu ditu eta sortutako guztizko potentzia megawat batekoa da.
2024: berrikuntza eta nazioarteko proiekzioa 20. urteurrenean
Bilbao Exhibition Centreren egutegiaren atzean, laneko plana dago finkatuta eta horren helburua da jarduera berrikuntza maila altuko sektore estrategikoei lotzea. Konpromiso horren ondorioz, eta BECen 20. urteurrena ospatuko den urtean, sektore energetikoarekin lotutako nazioarteko ekimen ugari antolatu dira eta horietako batzuk ondorengoak dira: EHEC-European Hydrogen Energy Conference edo WindEurope Annual Event. Horiek guztiak lehentasuna duten beste batzuekin (fabrikazio aurreratua, adibidez) batera antolatuko dira. Horrekin lotuta egongo da BIEMH-Makina-Erremintaren Nazioarteko Biurtekoaren 32. edizioa. Azoka horrek, ADDITꜪD, BeDIGITAL eta WORKinn-ekin batera, etorkizunerako erakusleihoa eskainiko du, eta bisitari eta erakusketariak lehen mailako ingurune industrialean barneratuko ditu.
BECek bideratzen duen jardueraren nazioarteko proiekzio handia agerian uzten du datu honek: Industria, Merkataritza eta Turismo Ministerioak orain gutxi Erabateko Nazioartekotzea estatusa eman die BIEMH, ADDITƐD, Egurtek, WindEurope eta Food4Future azokei. Gainera, Tendencias Creativas, Gustoko, Expovacaciones eta BeDIGITAL-ek Aduana Eraginekin lotutako Nazioartekotzearen aitortza jaso dute.
Amaitzeko, aparteko kontzertuen bidez emango zaio amaiera bikaina BECen 20. urteurrenari. Hala, Depeche Mode, Estopa, Maná, Ura Bere Bidean eta Zeid Fest jaialdia izango dira bertan, azoken eta kongresuen arloko bi deialdi esanguratsurekin batera: AFE-APCEren II. kongresua eta EMECAren (Europako azoka-esparru nagusiak biltzen dituen elkartea) urteko batzarra. Ekitaldien industrian liderra izaten emandako bi hamarkada horiei amaiera bikaina emango diote horiek guztiek.
