Lanbide Enplegu Zerbitzu Publikoak, 2024. urtean, hiru milioi euro bideratuko ditu gazteek prestakuntza eta lana txandakatzeko HEZIBI programa finantzatzeko. Programa horren bidez, gazteek beren lanbide-gaitasunak hobetzea nahi da, enpresa batean ordaindutako jarduera bat egiten duten bitartean.
Idoia Mendia Lehendakariorde eta Lan eta Enpleguko sailburuak proposatuta, Gobernu Kontseiluak argi berdea eman dio gaur Lanbide Heziketako ikasleei eta gazte langabeei zuzendutako programa honen zuzkidurari. Haren helburua da lanbide-gaitasunak hobetzea, Profesionaltasun-Ziurtagiri bat edo hasierako Lanbide-Heziketako titulu bat lortuz, enpresako lan-jarduera ordainduarekin txandakatuta. Horrela, enpresen beharrak langileek eskuratutako gaitasunetara egokitzen laguntzen da.
Onartutako zuzkidura, hiru milioi euro, txandakako prestakuntza-kontratuen dirulaguntzak finantzatzeko erabiliko da, bai eta profesionaltasun-ziurtagiri bat lortzeari lotutako proiektuen kostu gehigarria finantzatzeko ere. Enpresek programa honen esparruan egiten duten lanaldi osoko txandakako prestakuntza-kontratuaren urte bakoitzeko 2.000 euroko dirulaguntza emango da, eta kontratuaren iraupena urtebetetik beherakoa edo hortik gorakoa bada edo % 100etik beherako lanaldia badu, dirulaguntza iraupenaren eta lanaldiaren araberakoa izango da. Era berean, 400 euroko dirulaguntza emango zaio ziurtagiri hori emango duen prestakuntza-zentroari txandakako profesionaltasun-ziurtagiria egingo duen pertsona bakoitzeko.
Iaz, 867 kontraturi eman zitzaien dirulaguntza (1,67 milioi euro), eta 2022an, berriz, 782 kontraturi (1,52 milioi euro).
