Erakunde laguntzaileengana jo behar dute (Aller Usoa, Codisfiba, Gorabide eta Down-en Sindromea Fundazioa) elkartuta badaude, edo 010 zenbakira deitu, banaka bertaratuz gero, Angel Madrazo zinegotzi delegatuak azaldu duenez.
Finalaren aurretik aurreratu zuen bezala, Athleticen Errege Kopako 25. tituluak sortutako ikusmin eta ilusioaren aurrean, Barakaldoko Herritarren Segurtasunerako eta Babes Zibilerako arloak Itsasadarraren ondoan espazio irisgarri bat jarriko du desgaitasuna duten pertsonek Gabarraz gozatzeko aukera izan dezaten udalerritik igarotzean.
Angel Madrazo zinegotzi delegatuak gaur jakinarazi duenez, interesdunek bi modu dituzte leku horretan lekua erreserbatzeko: lau erakunde laguntzaileetako edozeinen bidez, herritar elkartuen kasuan (Usoa tailerra, ezindu fisikoen kolektiboa (Codisfiba), Euskal Autonomia Erkidegoko Down Sindromea Fundazioa eta Gorabide- edo Barakaldoko telefono bidezko herritarren arreta-zerbitzuko telefonora deituz (010), banaka joan nahi izanez gero.
Izena telefonoz emateko epea asteazkenera arte luzatuko da, 14:00etan, edo lekua bete arte.
Pertsona horientzako lekua Portu dartsenako kai-muturra izango da, Urban auzoan dagoena, Madrazok gogorarazi duenez. «Aurreikusten den zaleen kopurua eta jai-giroa ikusita, beharrezkoa da segurtasun-neurriak zorroztea, bereziki kolektibo ahulenei, eta horregatik lan egin dugu hainbat astez ekimen honetan», azaldu du.
Espaziorako sarbidea behar bezala seinaleztatuta egongo da, eta erabiltzaileek bertatik igaro ahal izango dute, baita haien laguntzaileek ere, haien presentzia behar dutenean. Tokian Udaltzaingoa eta Babes Zibila egongo dira.
