Turismo, Merkataritza eta Kontsumoko sailburu Javier Hurtadok amaitu du merkataritzaren sektoreko ordezkariekin egindako bilera-sorta, hiru aldundiekin, EUDELekin, hiru hiriburuetako udalekin, sindikatuekin eta turismoaren sektorearekin egindako bilera instituzionalen ondoren.
Bilera-sortaren bigarren aste honetan, sailburua eta saileko lantaldea hiru lurraldeetako merkataritza-ganberekin bildu dira; Euskaldendak merkataritza-federazioarekin eta Arabadendak, Bizkaidendak eta Dendartean elkarteekin; Euskomer federazioarekin, Aenkomer, CECOBI elkarteekin eta Gipuzkoako Merkataritza Federazioarekin, eta Gazteiz On, San Sebastian Shops eta Bilbaodendak merkataritza-plataformekin.
Bileren helburua Saileko talde berria, Turismo eta Merkataritzako sailburuorde Jakes Aguirrezabal eta Merkataritzako zuzendari Izaskun Gómez aurkeztea izan da, baita XIII. legealdi honetarako helburu estrategikoak eta lan koordinatuak aztertzea ere. Merkataritza 2030 estrategiaren inplementazio betean gaude, “apustu argia”, sailburuak azaldu duenez, “merkataritza berritzailea, digitala, lehiakorra eta jasangarria lortzeko, eta sektorearekin batera egindako azterketa-, garapen- eta bateratze-lan luzearen emaitza, estrategia eraldatzaile bat lantzeko partaidetza-prozesu baten bidez”.
Sailburuak sektorearekiko lankidetzaren garrantzia azpimarratu du, “nigan beti aurkitu baitu aliatu bat, eta hala egiten jarraituko du”. Merkataritza da euskal ekonomiari ekarpen handiena egiten dioten 3 jarduera ekonomikoetako bat, enpleguari % 13 baino gehiagoko ekarpena egiten diona, eta eraldaketa sakoneko une batean dago. Horretan laguntzen dute aurrez aurre ditugun hiru trantsizioek: ingurumenekoak, soziodemografikoak eta digitalak. Hori dela eta, beharrezkoa da “lanean jarraitzea politika publiko sendoen eskutik, eta zuek, sektorearekiko bitartekari zaretenez, parte garrantzitsua zarete”.
