2024KO LEHEN SEIHILEKOKO DATUAK BULARREKO MINBIZIAREN BAHEKETA
- 2024ko urtarrilaren 1etik ekainaren 30era programa honek 423 tumore gaizto detektatzea lortu du eta 116.000 emakume baino gehiago gonbidatu ditu parte hartzera
2024ko lehen seihilekoan, Osakidetzak 116.131 emakume gonbidatu ditu Bularreko Minbizia Goiz Detektatzeko Programan parte hartzera, pandemiaren aurreko 2019ko aldi berean baino % 15 gehiago, eta horrek erakusten du programak Covid-19aren aurreko etaparen erritmoa berreskuratu duela. Baheketa-programa horren bidez, guztira 423 tumore gaizto detektatzea lortu da; 2019ko aldi berean 330 detektatu ziren.
Bularreko minbiziaren detekzio goiztiarra faktore erabakigarria da, tratamendu eraginkorragoak eta ez hain agresiboak, bizi-kalitate hobea eta biziraupen-tasa handiagoak ahalbidetzen dituelako. Hori dela eta, Osakidetzak duela 29 urte jarri zuen abian Detekzio Goiztiarreko Programa, Euskadiko emakumeen artean onarpen handia duena, % 80 inguruko parte-hartze tasekin.
Pandemiaren ondorioz, miaketen erritmoa moteldu egin zen, ezohiko neurriak hartu behar izan baitziren kutsatzeak geldiarazteko (edukiera mugatua itxarongeletan, mamografoen garbiketa…). Aldi horren ondoren, 2024ko urtarrilaren 1etik ekainaren 30era bitartean bildutako jarduera-datuek adierazten dute berreskuratu egin dela. Izan ere, iaz, programan parte hartzera gonbidatutako emakumeen kopurua 2019koa baino % 10 handiagoa izan zen: 187.004 gonbidapen egin ziren guztira, eta % 79,4ko parte-hartze maila izan zen, emakume bakoitzak jasotzen dituen bi gonbidapenak bete ondoren. Aztertutako 124.174 emakumeen artean, 715 tumore gaizto detektatu ziren, ia % 20 gehiago 2019an diagnostikatutakoen aldean, gehienak fase goiztiarretan.
Baheketetan parte hartzearen garrantzia
Osakidetzak azpimarratzen du oso garrantzitsua dela garaiz detektatzea gaixotasun hori garaiz tratatu ahal izateko, emakumeen artean tumore mota ohikoena baita. Programan parte hartzeko gonbidapena 50 eta 69 urte bitarteko emakumeei egiten zaie, baita 40 eta 49 urte bitarteko emakumeei ere, lehen mailako bularreko minbizia duten familiartekoei (ama, alaba, arreba). Proba honetan mamografiak bi bularretan egiten dira.
2023ko abenduaren 31ra arte bildutako datuen arabera, mamografia egiten denetik emaitzaren berri ematen duen gutuna jaso arte igarotzen den batez besteko denbora 6,3 egunekoa da, eta 4,1 egunekoa balorazioa egiten denetik erreferentziako ospitalera bideratzen den arte, beharrezkoa izanez gero. Kasu horietan, ospitaleko proba diagnostikoak egin ondoren, tratamendua hilabete inguruko epean hasten da, batez beste.
Mamografo-ekipo berrituak
Gaur egun, Osakidetzako Bularreko Minbizia Goiz Detektatzeko Programak kudeaketa-unitate 1, 11 baheketa-unitate, 7 balorazio-unitate eta erreferentziazko 5 ospitale ditu, eta ospitale horietako Bularreko Batzordeek, astean behingo saio klinikoetan, jarraibide diagnostiko-terapeutikoak eta lesio susmagarrien jarraipena ezartzen dituzte. Hori guztia eragindako emakume guztiei zerbitzurik onena eta arreta integrala eskaintzen dien profesional-talde batek gidatuta.
Gainera, Osakidetzak mamografo asko berritu ditu azken bi urteetan, eta gaur egun unitate guztiek mamografo-ekipoak dituzte (15 guztira) tomosintesiaren teknologiarekin, mamografia digitalaren 3D forma aurreratua, doitasun handiagoko irudia lortzeko eta minbizien detekzioa hobetzeko.
