Eusko Jaurlaritzak eta Giza Asentamenduetarako Nazio Batuen Programak (NBE-Habitat) 2019an Hiri Agenda Berriko (HAB) bazkideen gaitasunak indartzeko akordioa sinatu ondoren, 2024an behar bezala egin du aurrera Euskadiko 2050eko Hiri Agendaren inplementazioak. Nazio Batuen Erakundearen agenda hori 2016an onartu zen, mundu osoko herrien eta hirien garapen jasangarrirako gida nagusi gisa.
Horren bidez, gaiari buruzko ezagutzak areagotu nahi dira eta garapen jasangarria bultzatuko duten sareak sortu nahi dira. Mundu jasangarria hiru ardatzetan oinarritzen da: ekonomiaren hobekuntza, gizarte-garapena eta ingurumenaren zaintza. Nazio Batuen Erakundearen 2030eko Agendak garapen jasangarrirako finkatu zuen 11. helburuari jarraituz, Miguel Ángel Páez Hiri Agendako sailburuordea eta Beatriz Jordao Espainiako NBE-Habitat bulegoko burua bat datoz auzo bizigarriagoak, zentzu guztietan, lortzeko helburuarekin, lehenengoaren hitzetan.
“Gaur egun 25 auzotan ditugu jarduketak, 175 milioitik gorako aurrekontuarekin, funts propioen eta Europako funtsen artean. Jarduketak eraikinen birgaitze integralean oinarritzen dira, hain zuzen irisgarritasun eta energia-efizientziako baldintzak hobetzean, espazio publikoa jasangarritasun-irizpideekin berrurbanizatzean eta jarduera handiagoko auzo jasangarriagoak sortuko dituzten ekipamendu berriak sortzean”, azaldu du Páez sailburuordeak. Erantsi duenez, Nazio Batuen Erakundeak “gure lankidetza bilatzen du, gure politikak eta jardunbideak munduko beste alde batzuetan egiten denaren aurretik doazen jakitun”.
Era berean, sailburuordeak NBE-Habitat erakundearekin lortutako lankidetza goraipatu du; izatez, Eusko Jaurlaritzak Nazio Batuen Erakundeko adituen asistentzia jasotzen du garapen jasangarria hobetze aldera. Bestalde, Jordaok bat egin du balorazio horrekin, eta Euskadik “beste herrialde batzuekin sareak eraiki ditzan” nahi du, batez ere garapen-prozesuan daudenekin, “horiek baitira euskal esperientzia onak partekatzeko helburu nagusia”. Horrenbestez, sailburuordeak berak “gizarte-sentsibilizazio handiko elementua” duten politikei “ikusgarritasun handiagoa” ematearen aldeko apustua egin du.
Eusko Jaurlaritzaren eta NBE-Habitat erakundearen arteko lankidetza fase berri honetan, bi lehentasun daude: hirien diseinu jasangarria eta erresilientea egitea, aniztasuna eta inklusioa ezaugarri hartuta. Horretarako, Eusko Jaurlaritzaren eta euskal udalerrien arteko lan-esparrua egokitu eta partekatuko da, gure auzo eta hirietako garapen jasangarrirako lanak hobetu daitezen eta areago daitezen. Ildo horretan, Euskadiko Hiri Agendan eta udalen ekintza-planetan barne hartuko den gida zehaztuko da.
Horrenbestez, helburua da 2050era begira dagoen Euskadiko Hiri Agendari beste bultzada bat ematea, eta hiri-kokaleku guztietan tresna eta adierazle berriak txertatzea, ekonomia, gizarte eta ingurumen aldetik hobeak diren hiriak eraiki daitezen.
