Amaia del Campo alkateak eskerrak eman dizkie Lutxanako bizilagunei «auzoan egindako lanagatik», eta azpimarratu du «inork ez dezala zalantzarik izan enpresa arauren bat urratzen ari dela frogatzen bada, legeak baimentzen dituen neurri egokiak hartuko direla». Lutxanako herritarrek aurkeztutako mozioa arratsaldeko osoko bilkuran onartu da, EAJ-PNV, EH-BILDU, Elkarrekin Barakaldo eta PPren aldeko botoarekin eta PSE-EEren abstentzioarekin.
«Eskuak ez dit dardararik egingo enpresa aldi baterako ixteko dekretua sinatzean, txosten teknikoek hala bermatzen badute». Irmo izan da Amaia del Campo Barakaldoko alkatea gaur arratsaldean udaletxean egindako osoko bilkuran. Bertan, Lutxanako bizilagunek aurkeztutako mozioa eztabaidatu da, auzoko enpresa batek sortzen duen zarata gogaikarriaren inguruan. Udala ikerketa tekniko batean murgilduta dago, enpresa araudia betetzen ari ez den edo uneren batean bete ez duen argitzeko. Ikerketa honetan frogatuz gero, horrek neurri legalak ekarriko ditu, «inork ez dezala zalantzarik izan», esan du Del Campok.
Udalean ordezkaritza duten alderdi guztiek, PSE-EEk izan ezik (abstenitu egin da), mozioaren alde bozkatu dute, Lutxanako herritarrak egiten ari diren lanaren alde. «Mozioak dagoeneko egiten ari garen zerbait eskatzen du, enpresari ezar dakizkiokeen zigorrak aztertzeko espedientea sortzea», adierazi du Del Campok.
Jakinarazi den bezala, udaleko teknikariak dokumentazioa eskatzen ari zaizkio enpresari, egiten ari direna ondo azal dezaten. Dokumenturen bat bidali du dagoeneko, eta Eusko Jaurlaritzako teknikarien laguntzarekin aztertzen ari dira, une oro laguntzeko prest agertu baitira. Baina oraindik enpresak bidali beharreko dokumentazioa falta da.
«Astero harremanetan gaude enpresarekin arazo honekin behingoz amaitzeko eskatzeko, eta bitartean espedientean lanean jarraitzen dugu, hori baita zarata jasanezin honekin bizilagunek duten arazoari behin betiko erantzun sendoa emateko modu bakarra», adierazi du alkateak. «Baina inork ez dezala zalantzarik izan eskuak ez didala dardararik egingo teknikariek beharrezkotzat jotzen duten zigorra sinatzean», amaitu du.
