Juan Ignacio Pérez Iglesias sailburuak ongietorria egin die Ikerbasqueko ikertzaileei urteroko topaketan
240 Ikerbasque ikertzaile bildu dira Euskadiko zientziaren etorkizunari buruzko gogoeta egiteko
Ikerbasquek gaur egun 35 herrialdetako 400 zientzialari inguru ditu
Zientzia, Unibertsitate eta Berrikuntzako sailburuak, Juan Ignacio Pérez Iglesiasek ongietorria egin die gaur goizean Tabakaleran Ikerbasquek urtero antolatzen duen topaketan parte hartu duten ikertzaileei. Perezen esanetan, Ikerbasque mundu mailako erreferente bihurtu da ikertzaile bikainak erakartzen, bai eta ikerketaren sustapenean ere. Bere hitzaldian, 240 ikertzaileren aurrean, adierazi du gaur egun Eusko Jaurlaritzaren lidergoa eta ikuspegia 15 urte baino gehiagoan fruituak ematen ari dela.
Sailburuak, Fernando Cossio Ikerbasqueko zuzendari zientifikoa eta Amaia Esquisabel Ikerketaren zuzendaria bertan zirela, azpimarratu du erakunde, unibertsitate eta ikerketa-zentro guztien arteko lankidetza funtsezkoa izan dela Ikerbasquek arrakasta izan dezan. Ildo horretan, Perezek esan du beharrezkoa dela lankidetza horri eustea eta indartzea, horrek ahalbidetzen baitu Euskadi mundu mailan lehiatu ahal izatea. Gogorarazi du, halaber, Eusko Jaurlaritzak politika zientifiko argia eta egonkorra duela, eta konpromiso horren oinarrian dagoela ikerketa eta garapeneko inbertsioa errentagarria dela, epe labur, ertain eta luzera.
Nola hobetu zientzia Euskadin: 2025-2028 Plan Estrategikoa
Ikerbasquek sustatutako topaketak helburu bikoitza zuen oraingoan: alde batetik, ikertzaileen arteko sinergiak ahalbidetzea, ideiak eta etorkizuneko proiektuak sor ditzaketen hausnarketa partekatuak eragitea. Baina, gainera, kasu honetan ere, zientzialarien inplikazio eta parte-hartze zuzena bilatzen zen, Ikerbasqueren 2025-2028 Plan Estrategikoari begira.
Ideia, gogoeta eta proposamen guztiak baliotsuak eta beharrezkoak direla sinetsita, Ikerbasquek bere ikertzaileak inplikatu ditu erronkak, aukerak, indarguneak eta hobetzeko arloak identifikatzen. Gero eta konplexuagoa eta interkonektatuagoa den mundu honetan, zientziak aurrera egiten du hainbat diziplinaren ezagutzari ezker, hala nola gaixotasun neurodegeneratiboak, material berriak, adimen artifiziala eta sortzen duen eztabaida, teknologia kuantikoa, klima edo energia.
Ikerbasqueri buruz
Ikerbasqueren – 2007an Eusko Jaurlaritzak sortutako Zientziarako Euskal Fundazioaren – programek talentua erakartzeko eta atxikitzeko helburu argia dute: batetik, ikerketa-lana atzerrian egiten ari direnak erakartzea, arreta berezia jarriz Euskal Autonomia Erkidegoko ikertzaileen itzuleran; eta, bestetik, beren ibilbidea sendotzeko aukerak eskaintzea Euskadin ikertzen ari direnei.
