Sailburuak positibotzat jo du Arcadi España Estatuko idazkariarekin atzo egindako bilera eta topaketak lanean jarraitzeko eta Lankidetzarako Aldebiko Batzordea prestatzeko balio izan zuela esan du
Maria Ubarretxena Eusko Jaurlaritzako, bozeramaile eta Gobernantza, Administrazio Digital eta Autogobernuko sailburua elkarrizketatu dute gaur goizean Euskadi Irratiko «Faktoria» saioan. Lehenik eta behin, Gobernuaren lehen 100 egunez mintzatu da bozeramailea eta azpimarratu du ilusioz eta gogoz ari direla lanean, “erronkak handiak dira, arazoak ere badira, baina arazo horiei irtenbideak emateko egingo dugu lan, begirada baikorretik eta jarrera eraikitzailetik” adierazi du.
Atzo Arcadi España Estatuko idazkariarekin izandako bilera ere izan du hizpide sailburuak eta azaldu du, atzokoa, lan bilera izan zela, esku artean dituzten gaietan aurrerapausoak emateko eta laster Pradales Lehendakariaren eta Sanchez presidentearen artean egingo den Lankidetzarako Aldebiko Batzordea prestatzeko. Eskumenen harira, azaldu du, kronograma berri bat dagoela mahai gainean eskumen bakoitzaren lanketa eta negoziaketarako eta berretsi du akordio bat dagoela eta akordio hori bete egin behar dela, “guk gure %100a emango dugu akordioa bete dadin” gaineratu du. Gizarte segurantzaren harira adierazi du denbora luzea emango duela eskumen honen lanketak, baina arrazoi horregatik jada Jaurlaritzan hasita daudela proposamena lantzen.
Gobernuaren lege egutegia, herri erronkei erantzuteko
Aste honetan aurkeztu du lege aurreikuspena Jaurlaritzak, 17 izango dira Jaurlaritzak garatu eta Eusko Legebiltzarrera eramango dituen legeak, bozeramailearen hitzetan “gizarte erronkei aurre egiteko beharrezkoak diren legeak dira”. Horietako bi lege Gardentasunaren Legea eta Administrazioa Arintzeko eta Sinplikatzeko Legea, Ubarretxenak gidatzen duen sailari dagozkio.
Gardentasun legearen harira, sailburuak azpimarratu du, legerik ez izan arren, Euskadin jada legean jasotako hainbat eginkizun gauzatzen direla. Edonola ere, beharrezkotzat jo du lege berria izatea; “espero dugu legealdi honetan legea onartzea, guztien ekarpenekin osatutako lege on bat izan dezagun”. Sailaren pean garatuko den bigarren legeak, Administrazioa Arintzeko eta Sinplifikatzeko Legeak, herritarren egunerokotasuna erraztea du helburu, “lehenik eta behin, diagnostikoa egingo dugu, interoperabilitatea azkartu eta hobetzeko eta digitalizazioaren eskutik prozedurak arintzeko” azaldu du.
