• Zazpi marka Eusko Jaurlaritzako Elikadura, Landa Garapen, Nekazaritza eta Arrantza Sailak sustatutako standean parte hartzen ari dira.
• SIAL Paris azokak hogeita hamargarren edizioa ospatzen du aurten, bere historiako handiena, eta 285.000 profesionalen bisita espero du.
Euskal nekazaritzako elikagaien industria bere produktuak erakusten ari da egun hauetan SIAL Paris azokaren hogeita hamargarren edizioan, urriaren 23ra arte Frantziako hiriburuko Nord Villepinte erakustazokan egiten ari den elikagaien sektoreko munduko topaketa profesionalik handiena.
Raimundo Ruiz de Escudero HAZIko zuzendariak zehaztu duenez, «zazpi euskal enpresak parte hartzen dute azoka honetan, Euskadi Basque Country standaren barruan. Eusko Jaurlaritzako Elikadura, Landa Garapen, Nekazaritza eta Arrantza Sailak sustatu eta antolatzen du ekintza hau, HAZI Fundazioaren bitartez, eta Euskadiko Elikagaien Industriaren 2024ko Sustapen Planaren barruan dago».
Euskadiko erakustokiak 100 m2-ko espazioa du aurtengo edizioan, eta azokaren Gourmet gunean dago. Hauek dira Eusko Jaurlaritzaren eskutik parte hartzen duten enpresak: Ameztoi Anaiak, aurrez prestatutako platerak eta kalitate handikoak; Cafés Baque; Conservas Ortiz; Conservas Serrats; La Cocina de Senén, egindako gourmet produktuak; Txogitxu, behi-haragia zatikatzen eta saltzen espezializatua; eta Sarriegui Potato Chips. Gainera, Euskadiko standetik kanpo, beste bi enpresak parte hartzen dute: Nortindal eta Yurrita Group.
SIAL Paris Elikaduraren Nazioarteko Azoka publiko profesional bati soilik zuzendutako azoka da, eta Kolonian (Alemania) egiten den ANUGA azokarekin batera, mundu mailako elikaduraren sektorerako hitzordu nagusiak dira. Edizio honek 130 herrialde baino gehiagotako 7.500 erakusmahai ditu, eta 400.000 elikagai-produktu erakusten dituzte. Gero eta nazioartekoagoa da, 2022an egindako edizioan nazioarteko ordezkaritza % 90ekoa izan baitzen erakusmahaien artean eta % 85ekoa bisitarien artean.
Azokaren antolakuntzaren arabera, aurten historiako ediziorik handiena izaten ari den sektoreko 285.000 profesionalen bisita espero da.
