«Gure begiak eta ahotsa zarete Europan. Zuen ekarpena funtsezkoa da Euskadik nazio global eta konektatu gisa aurrera egiten jarrai dezan «, adierazi dio Imanol Pradales Lehendakariak Bruselako euskal komunitateari
Lehendakaria Eusko Jaurlaritzak Europar Batasunaren aurrean duen Ordezkaritzan izan da gaur arratsaldean, euskal komunitateari egindako harrera batean. Bertan, Euskadik Europako proiektuaren egonkortasunarekin eta indarrarekin duen konpromisoa azpimarratu du. Hitzaldian, Imanol Pradalesek nabarmendu du Euskadi herrialde fidagarria eta konprometitua dela, lurralde egonkor eta segurua, Europako eskualde-esparrua indartzeko eta Europar Batasunaren garapen globalari laguntzeko lan egiten duena.
Lehendakariak azpimarratu du Euskadi bat datorrela Europako politika eta balio nagusiekin, hala nola subiranotasun estrategikoarekin, ongizatearen eta kohesioaren ereduarekin, ongizatera bideratutako lehiakortasunarekin eta giza eskubideekin. «Europarekin dugun konpromisoa ez da politikoa edo ekonomikoa bakarrik, etikoa eta soziala ere bada. Europar Batasunaren sorrerako balioak defendatzen ditugu: bakea, demokrazia, askatasuna eta elkartasuna «, adierazi du.
Lehendakariak, halaber, Eusko Jaurlaritza Euskadik Europan duen presentzia eta eragina indartzeko ematen ari den urrats zehatzak nabarmendu ditu: Ekonomia Itunaren Batzorde Mistoaren esparruan Euskadik ECOFIN eta ELGA bezalako foroetan parte-hartze handiagoa izateko akordioa; Makroeskualde Atlantikoa sortzea eskualdeko lankidetza indartzeko eta aliantza estrategikoak bultzatzeko, edo hirietako eta eskualdeetako erakundeetan parte-hartzea handitzea.
Gainera, Lehendakariak mezu hunkigarria bidali dio Bruselako euskal komunitateari, Euskadiren enbaxadore gisa egindako lana eskertuz eta giza, kultura eta ekonomia garapenari egindako ekarpenaren garrantzia azpimarratuz: «Gure begiak eta gure ahotsa zarete Europan. Zuen ekarpena funtsezkoa da Euskadik nazio global eta konektatu gisa aurrera egiten jarrai dezan «, adierazi du.
Azkenik, Pradalesek berretsi egin du Europa osatzen duten herrietatik eraikitako Europarekiko konpromisoa, «estatuen klub» batetik haratago. «Euskadik eragile aktiboa izan nahi du Europa indartzeko, eragin globalerako gaitasuna izango duen Batasunari lagunduz. Herrialde fidagarria, egonkorra eta segurua gara», gaineratu du.
