Barakaldoko Gazteria Zerbitzuak Norabidean jardunaldiak jarri ditu abian aurten ere. Gazteei eta haien familiei prestakuntzarekin eta ikasketekin lotutako erabakiak hartzeko prozesuan orientatzeko aukera ematen dien proiektua da. Jardunaldiak GAZ Barakaldo zerbitzuaren barruan antolatu dira, emantzipazioa eta enplegua sustatzeko, eta otsailaren 3an eta 5ean egingo dira, 10:00etatik aurrera. Programa Barakaldoko DBHko 3. eta 4. mailako gazteei, Batxilergoko 1. eta 2. mailakoei eta haien familiei zuzenduta dago. Ekimena doakoa da eta aldez aurretik izena ematea gomendatzen da, telefonoz (944 789 596) edo Whatsapp bidez (688 639 935).
Nerabezaroan hainbat erabaki hartu behar dira, bizitzako hainbat esparrutan. Horietako bat prestakuntzaren eta ikasketen esparrua da, gazteen hurrengo urteak eta, neurri handi batean, lan-etorkizuna baldintzatuko dituena. Hala ere, sarritan, erabakiak hartzea zaila izaten da, bai gazteentzat, bai haien familientzat, prozesu horretan lagundu behar baitute. Horregatik, Gazteria Sailak, gazteen emantzipazioari laguntzeko GAZ zerbitzuaren esparruan, bigarren urtez egingo ditu hezkuntza-orientazioko eta -laguntzako jardunaldi hauek.
ATE IREKIEN JARDUNALDIAK, GOIZEZ
Otsailaren 3ko eta 5eko goizetan, 10:00etatik 14:00etara, GAZ Barakaldo zerbitzua bereziki bideratuta egongo da inguruneko prestakuntza- eta orientazio-baliabideak ezagutu nahi dituzten gazteei eta familiei harrera egitera. Horrela, goiz osoan zehar, San Juan kaleko gazte-bulegoan dagoen GAZ-Barakaldo zerbitzutik, inguruan eskaintzen diren gazteentzako prestakuntza- eta orientazio- eta aholkularitza-baliabideen aurkezpenak egingo dira.
ORIENTAZIO SAIOAK, ARRATSALDEZ
Gainera, otsailaren 3tik 6rako arratsaldeetan bokaziozko orientaziorako programa bat garatuko da, gaur egun dauden aukera akademiko eta laboralak lantzeko: lanbide heziketa, unibertsitatea, aukera berriak… Era berean, azken urteetan sortu diren gradu ezberdinak eta ikasketa modalitate berriak ezagutzera emango dira.
Gainera, lan-merkatuak azken urteetan izan duen joera eta gaur egun gehien eskatzen diren lanbideak aztertuko dira, betiere bizitzarako eta lanerako gaitasunak kontuan hartuta: Zer egitea gustatzen zait? Zer gertatzen zait ondo? Zer kostatzen zait gehiago?
Prestakuntza-programa bi saiotan banatuko da, eta honako gai hauek landuko dira:
1. Saioa: Zeharkako gaitasunak edo bizitzarako trebetasunak landuko dira, baita bokazio profesionala eta erabakiak hartzen laguntzen diguten esperientziak edo tresnak ere.
2. Saioa: Unibertsitateko nahiz egungo lanbide-heziketako prestakuntza-eskaintzari buruz hitz egingo da, baita merkatuaren egungo egoerari buruz eta aukera bakoitza nola eskuratu ulertzeko gakoei buruz ere. Azkenik, ezagutzen hasteko eta aukeretan gehiago murgiltzeko dauden aukerei eta tresnei buruz ere hitz egingo da.
SAIOAK HONELA EGINGO DIRA:
DBHko 3. eta 4. mailetako eta lanbide-heziketako ikasleentzako talde-saioak:
- Noiz: Otsailak 3 (astelehena) eta 5 (asteazkena).
- Ordutegia: gazteak, 17:00-18:30; familiak, 19:00-20:30
- Non: Gazte Bulegoa (San Juan kalea, 17)
Batxilergoko 1. eta 2. mailetako ikasleentzako talde-saioak:
- Noiz: Otsailak 4 (asteartea) eta 6 (osteguna)
- Ordutegia: gazteak, 17:00-18:30; familiak, 19:00-20:30
- Non: Gazte Bulegoa (San Juan kalea, 17)
