Akordio honek segurtasun publikoa hobetzen lagunduko du, euskal herritarrei zerbitzu eraginkorragoa eta koordinatuagoa eskaintzeko
Gobernu Kontseiluak Eusko Jaurlaritzako Segurtasun Sailaren eta Euskadiko Udalen Elkartearen (EUDEL) arteko lankidetza-hitzarmen berri bat sinatzea onartu du, polizien lankidetza eta koordinazioa indartzeko. Akordio horrek 2018an sinatutakoa ordezkatuko du, eta elkarlanerako mekanismoak eguneratzeko beharrari erantzuten dio, arau-aldaketetara eta azken urteetan hartutako esperientziara egokituta.
Lankidetza-esparru egonkorra finkatzen duen eta plan estrategiko berriak garatzen lagunduko duen hitzarmen berriak lehentasunezko jarduera-esparru batzuk ezartzen ditu:
- Udaltzaingoen antolaketa eta funtzionamendua hobetzen lagunduko duten azterlanak egitea.
- Egiturari, langile-kopuruari, baliabide teknikoei, armamentuari, ekipamenduari, uniformeei eta akreditazio profesionalerako dokumentazioari buruzko irizpideak bateratzea.
- Udaltzaingoen hautaketa-prozedurak eta lanbide-prestakuntza indartzea, betiere udal-autonomia bermatuz, Polizia eta Larrialdietako Euskal Akademiaren laguntzarekin.
- Udaltzaingoen barruan berdintasun-politikak eta euskararen erabilera sustatzea.
- Eraginkortasuna hobetzeko lan-prozeduretan irizpide komunak definitzea.
- Ertzaintzaren eta udalerrien arteko lankidetza, egoera bereziei edo apartekoei eraginkortasun handiagoz aurre egiteko.
- Ertzaintzaren eta udaltzaingoen arteko lankidetza-esparruak ezartzea eta mantentzea, polizia-baliabideak optimizatzeko eta segurtasun publikoa hobetzeko.
- Bide-segurtasunaren arloan estrategia eta prozedura bateratuak sortzea, trafiko-istripuak gutxitzeko.
Lan-mahaiak
Horretarako, Segurtasun Sailak sustatutako eta koordinatutako lantalde edo mahai teknikoak, bai adituenak bai poliziarenak, aktibatuko dira, EUDELek izendatutako udalerri guztiek, haien tamaina edozein dela ere, parte-hartze erreal eta eraginkor baten bidez, aktiboki lagundu ahal izan dezaten ekimen berri horiek garatzen. Gainera, hitzarmenak bi aldeen ordezkariek ostatutako jarraipen-batzorde bat sortzea aurreikusten du. Organo horrek aldian-aldian ebaluatuko du akordioen garapena, eta aurreikusitako neurriak behar bezala aplikatzen direla zainduko du.
Hala, Eusko Jaurlaritzak eta EUDELek berretsi dute, polizia-mailako lankidetza eta elkarlana etengabe hobetuz, segurtasun publikoa hobetzeko konpromisoa, euskal herritarrei zerbitzu eraginkorragoa eta koordinatuagoa eskaintzeko.
