Javier Hurtado Turismo, Merkataritza eta Kontsumoko sailburuak Kontsumobideren 2024ko jarduera-balantzearen memoria aurkeztu du gaur, Kontsumobide-Kontsumoko Euskal Institutuko zuzendari Tontxu Rodríguezekin batera.
2024an, Euskadiko kontsultak % 9,3 igo ziren 46.877 kontsultetara, eta erreklamazioak (28.359), berriz, % 1,8 igo ziren 2023ko datuekin alderatuta. Nabarmentzekoa da, lehenengo aldiz, banku-sektorea dela kontsulta- eta erreklamazio-kopuru handiena duen sektorea, telekomunikazioak eta orain arte rankineko lehena izan den telefonia gaindituta, bai eta hornidurako zerbitzuak ere, hala nola ura edo energia. Horren arrazoia, neurri handi batean, Kontsumobiden banku-zerbitzuen erreklamazioen herena ekarri duten hipoteka-gastuengatiko erreklamazioak dira.
28.000 horietatik, 15.000 erreklamazio inguru erregistratu dira Kontsumobiden, gainerakoak kontsumitzaileen arretarako bulegoen eta kontsumo-elkarteen artean banatzen baitira. Kontsumobidek izapidetzen dituen erreklamazio horien erdiak (% 46) bitartekaritzarekin eta adostasunarekin amaitzen dira, hau da, kontsumitzailearen eta enpresaren arteko akordio batera iristen dira, eta «hori oso positiboa da».
Zehapen-prozedurari dagokionez, 2024an Kontsumobidek 447 zehapen-espediente ebatzi zituen guztira, 1,7 milioi eurotik gorakoak, zehapenetan. Zehapen gehienak eta zenbatekorik handienak honako hauetan izan dira: etxetresna elektrikoetan (ekipo informatikoak eta ikus-entzunezkoak barne), ibilgailuen konponketan eta ehungintzan (oinetakoak eta osagarriak barne).
Sailburuak Kontsumobideren beste zutabeetako bat nabarmendu nahi izan du: prestakuntza 3.186 formazio-ekintzatan gauzatu da, eta ia 39.000 pertsonak parte hartu dute, aurreko urtean baino % 4 gehiagok. «Kontsumo arduratsura joko dugu beti, jasangarritasun- eta arrazionaltasun-irizpideak kontuan izanda, tokiko erosketara eta bizi nahi dugun munduan kontsumitzaile gisa ditugun eskubideak defendatzera».
Webgune berria
Sailburuak azpimarratu du 2024an finkatu dela 2023an onartutako kontsumitzaileen eta erabiltzaileen estatutua, eta «kontsumitzaileak defendatzeko tresnetako batzuk erabat garatu ahal izan direla”. Esate baterako, “zehapenak argitaratu egiten dira, enpresentzako eredu izateko asmoz eta disuasio-asmoz. Kontua da jardunbide egokiak eta enpresa-etika sustatzea, hori baita Kontsumobideren helburu nagusietako bat».
Zehapen horiek Kontsumobideren webgune berrian argitaratzen dira. Webgunea 3 helburu argirekin berritu da: kontsumitzaileei Kontsumobiden gehien eskatzen diren izapideetarako sarbidea erraztea; komunikazioa eta informaziorako sarbidea modu erraz, atsegin eta ulergarrian hobetzea; eta administrazioa gizartera hurbiltzea.
