Idiazabal eta Alegiako (Gipuzkoa) udalerriek bat egin dute Eusko Jaurlaritzako Osasun Sailak eta Gipuzkoako Farmazialarien Elkargo Ofizialak bultzatutako programa horrekin, eta dagoeneko 600 pertsona baino gehiago ari dira programan parte hartzen gure lurraldean
Gipuzkoako Idiazabal eta Alegia udalerriek bat egin dute gaur Eusko Jaurlaritzako Osasun Sailak eta Gipuzkoako Farmazialarien Elkargo Ofizialak bultzatutako Etxez Etxeko Laguntza Zerbitzuaren eta Gizarte Zerbitzuen erabiltzaileen artean medikamentuen erabilera hobetzeko programarekin. Idiazabalgo alkate Iñaki Alberdik eta Alegiako alkate Regina Sorarrainek, gaur goizean, bi udalerriak programara atxikitzeko akordioa sinatu dute Eusko Jaurlaritzako Farmaziako zuzendari Iñaki Betolazarekin eta Gipuzkoako Farmazialarien Elkargo Ofizialeko presidente Miguel Angel Gastelurrutiarekin. Sinadurak udalerri bakoitzeko udaletxeetan egin dira, eta programan parte hartzen duten farmazialariak bertan izan dira.
Idiazabal eta Alegia gehituta, jada 49 dira programan parte hartzen duten Gipuzkoako udalerriak (151 Euskadin). Programaren helburu nagusia da sendagaia errazago eskuratzea eta tratamendua behar bezala betetzen dela bermatzea, medikazioaren erabilera eta atxikidura hobetuz. Horretarako, herri bakoitzeko farmaziek etxez etxeko laguntzailearekin eta/edo zaintzaile nagusiarekin elkarlanean jarduten dute sendagaiak eskuratu, kontserbatu eta ematearekin zerikusia duten alderdi guztietan.
Programa honetan parte hartzeko, Gipuzkoan 277 farmazia akreditatuta daude, eta hauek 600 herritar baino gehiagorentzako botikak prestatzeaz arduratzen dira.
Eusko Jaurlaritzako Farmaziako zuzendari Iñaki Betolazak nabarmendu duenez, etxez etxeko laguntza-zerbitzuek artatutako pertsonen medikazioaren erabilera hobetzeko programa hau abian jartzeak helburu bikoitza du. «Alde batetik, gure gobernu-programa betetzea, farmaziak osasun-agente gisa indartuz eta haiekin lankidetzan arituz; eta, bestetik, pertsonak gure jardunaren erdigunean jartzen ditugu, haien beharrei erantzuteko eta haien bizi-kalitatea hobetzeko», adierazi du.
Farmazia komunitarioa funtsezkoa atxikidura terapeutikoan
Idiazabalek 2.268 biztanle ditu eta farmazia bat. Akordioa sinatu ondoren, farmaziako titular Aurora Milla pozik agertu da udalerriak programarekin bat egin duelako, «farmazian egunero ikusten dugulako paziente batzuek beharra dutela bakarrik bizi direlako edo, adibidez, seme-alabak kanpoan bizitzen dituzten eta, ondorioz, botiken kontuaz arduratu ezin direlako».
Millak ekimenaren balorazio positiboa egin du eta farmazia komunitarioaren rola atxikimendu terapeutikoan funtsezkoa dela gogorarazi du. “Askotan ikusten dugu adineko pertsona batzuek ez dutela medikazioa bukatzen, edo ez dutela argi botikak nola hartu behar dituzten, edo etxean zer daukaten gogoratzen ez dutenak… Programa honekin, espero dut pertsona guztiek botikak ondo antolatuta izatea eta medikuen jarraibideak errespetatzea”, esan du.
Bestalde, Idiazabalgo alkate Iñaki Alberdik azpimarratu duenez, «programa honekin beste urrats bat ematen dugu Idiazabalgo gizarte-zerbitzuak eta mendekotasuna duten pertsonentzako arreta hobetzeko, eta, zalantzarik gabe, etxez etxeko laguntza-zerbitzuaren erabiltzaileen egunerokoan ekarpen positiboa egingo duen koordinazioa indartzen dugu«. Akordioa sinatu duten gainerakoen inguruan aipatu du «Udalak eskertzen duela idiazabaldarren osasunarekiko konpromisoa eta inplikazioa», eta «asko baloratzen dugula gurekin batera lan egiteko ahalegina eta prestutasuna».
Ongizatea eta bizi-kalitatea hobetzea
Alegiako alkate Regina Sorarrainek gogorarazi du Udala dela herritarrengandik hurbilen dagoen erakundea, eta, ildo horretan, «gure lehentasunetako bat adinekoen ongizatea bermatzea da. Oso modu positiboan baloratzen ditugu ekimen horiek, pertsona horien ongizatea eta bizi-kalitatea hobetzen laguntzen baitute».
Gipuzkoako udalerri horretan 1.859 pertsona bizi dira eta farmazia bat dago. Farmaziako titular Elena Arratibelek akordioa sinatu ondoren adierazi duenez, «farmaziatik gure aletxoa jarri nahi dugu herritarren osasuna hobetzeko. Programa honen bidez, pazienteek sendagaiak zuzen hartzea lortu nahi dugu, modu okerrean hartzeari lotutako arazoak saihestuz, hala nola tratamenduaren bikoizketak eta tratamendua ez betetzea».
Dosifikazio-sistema pertsonalizatuak
Programaren funtzionamenduari dagokionez, udal bakoitzeko Gizarte Zerbitzuetako zuzendaritzak programan parte hartuko duten pertsonak aukeratzen ditu, eta pertsona horiek, programan sartu aurretik, baimena eman behar dute. Ondoren, erabiltzaileak farmazia aukeratzen du eta elkarrizketa bat egiten zaio. Elkarrizketa horretan oinarrituta, fitxa bat betetzen da hartzen duen medikazioari eta osasun-arazoei buruzko informazioarekin. Ondoren, hamabostean behin edo astean behin, farmazialariak dosifikazio pertsonalizatuetan banatuta prestatzen eta entregatzen ditu botikak.
Horretarako, dosifikazio-sistema pertsonalizatuak (DSP) erabiltzen dira. Horietan, pazienteak eguneko une bakoitzean hartu behar dituen pilulak jartzen dira, dosia behar bezala hartzeko behar den informazioarekin batera.
