Bizkaiko Foru Aldundia ikuspegi eta azterketa berri bat bultzatzen hasi da, etorkizunean etxerik gabeko emakumeekin eta indarkeria matxistaren biktimekin esku hartzeko proposamenak egiteko.
Zehazki, Deustuko Unibertsitateak Bizkaiko Foru Aldundiko Enplegu, Gizarte Kohesio eta Berdintasun Sailak antolatutako «Gizarte-bazterkeriako egoeran eta/edo indarkeria matxistagatiko babesgabetasunean dauden emakumeentzako eskakizun txikiko bizitoki-ereduen azterketa» mintegia hartu du gaur.
Ekitaldiak eremu sozialeko profesionalak, hainbat erakunde publiko eta gizarte-erakundetako ordezkariak bildu ditu, dauden ostatu-ereduak aztertzeko eta indarkeria matxistaren biktima diren emakumeei arreta eraginkorragoa emateko egin daitezkeen hobekuntzak ikertzeko.
Mintegi horrek ikerketa baten hasiera markatzen du, urte batean zehar garatuko dena, Bizkaian emakume horientzako bizitoki- eta laguntza-baldintzak hobetzeko helburuarekin. Ikerketak bermatu nahi du ostatu-zerbitzuek gizarte-bazterkeriako egoeran dauden emakumeen beharrei eraginkortasunez erantzutea, eta horrekin batera, indarkeriarik gabeko ingurune segurua, autonomoa eta errespetuzkoa eskaintzea.
Bere hitzaldian, Teresa Laespadak, Bizkaiko Enplegu, Gizarte Kohesio eta Berdintasuneko foru diputatuak, azpimarratu du Aldundiak konpromiso irmoa duela bizitoki-ereduak sortzeko, aterpe baten beharrari berehalako erantzuna emango diotenak.
«Aldundian uste dugu ostatu egokia ematea betebeharra dela, baina are garrantzitsuagoa da emakumeei indarkeria matxista jasan ondoren duintasuna, autonomia eta ongizatea berreskuratzeko aukera emango dieten espazioak sortzea», adierazi du Laespadak.
Gainera, adierazi du helburua dela «emakume bakoitzaren premia espezifikoei erantzungo dieten laguntza-, babes- eta ahalduntze-inguruneak sortzea, eredu pasiboak betikotuko dituzten irtenbide asistentzialistak edo hertsatzaileak erabili gabe».
Mintegia Deustuko Unibertsitateko ikerketa-taldearen aurkezpenarekin hasi da, eta bertan Bizkaiko Foru Aldundiak ezarritako ostatu-ereduen azterketa sakona egin du. Azterlan honen ardatza da nola hobetu ditzaketen ingurune komunitario batean garatutako eskakizun txikiko ostatu-ereduek gizarte-bazterketako egoeran dauden eta indarkeria matxistaren biktima diren emakumeen segurtasuna eta babesa. Era berean, ikerketak honi buruzko hausnarketa sakona planteatzen du: bizitoki horiek espazio fisiko bat eskaintzeaz gain, bizitoki horiek okupatzen dituzten emakumeen autonomia, ahalduntzea eta birgizarteratzea sustatu behar dute, bizitza duintasunez berreraikitzen laguntzeko.
Jarraian, bizitoki malguko ereduen eraginkortasuna frogatu duten hainbat esperientzia pilotu partekatu dira. Eredu horiek baldintzapen zorrotzik eza eta emakumeen intimitatearekiko errespetua dituzte ezaugarri, eta funtsezkoak dira emakumeen errekuperazioa sustatzeko. Aurkeztutako esperientziek azpimarratu dute garrantzitsua dela emakumeei erabakiak hartzeko prozesua errespetatuko duen ingurune bat eskaintzea, eta beren autonomian eta gizarteratzean aurrera egiteko behar duten laguntza ematea.
Mintegia baliagarria izan da, halaber, gizarte-erakundeek baliabide horiek kudeatzean dituzten zailtasunak ikusarazteko, hala nola etxebizitza egokien eskasia, langile espezializatuen gabezia eta administrazio publikoen eta hirugarren sektoreko erakundeen arteko koordinazio handiagoaren beharra. Ideia-truke horrek nabarmendu du garrantzitsua dela elkarlaneko konponbideak garatzea, eskura dauden baliabideak egoera zaurgarrian dauden emakumeen bizi-kalitatea hobetzera bideratuta daudela ziurtatzeko.
