Jardunaldiak belaunaldi berriek merkataritza-sektorea eraldatzeko eginkizunean duten garrantzia nabarmendu du
Javier Hurtado Turismo, Merkataritza eta Kontsumoko sailburuak GazteKinn jardunaldian parte hartu du. Bertan, ikasle gazteak eta etorkizuneko ekintzaileak bildu dira, belaunaldi berriak inspiratu eta motibatzeko, merkataritza-sektoreak eskaintzen dituen aukerak azter ditzaten eta ideiak proiektu erreal eta jasangarri bihurtzeko laguntza ezagut dezaten.
Hasiera-ekitaldian sailburuak azpimarratu duenez, «gazte askok oraindik ez dute argi beren etorkizun profesionala, ziurgabetasun naturala adin horretan. Bizitza ez da esaldi motibazionaletan laburbiltzen, baina ahalegin, ilusio eta aholkularitza egokiarekin orain lortu ezin diren helburuak lor daitezke».
Izan ere, jardunaldiaren funtsezko puntuetako bat honako hausnarketa hau izan da: belaunaldi berriek lehiarako abantaila bat dute. «Naturaltasunez mugitzen dira mundu digitalaren eta fisikoaren artean. Aurreko belaunaldiak ez bezala, gaur egungo gazteak kanal anitzeko erosketetan eta ordainketa- eta komunikazio-metodo berrietan adituak dira, eta horregatik moldakorrak dira eta prestatuta daude merkataritza-sektorean berritzeko», adierazi du sailburuak.
Ekintzaile izan nahi dutenentzat aukeraz betetako sektore gisa agertu da merkataritza, eguneroko bizitzaren funtsezko osagaia baita, pertsonak produktuekin, zerbitzuekin, kulturarekin eta entretenimenduarekin konektatzen dituena. Gainera, sailburuak iragarri du merkataritza-ekintzailetzarako laguntza-programa berri bat jarriko dela abian, 2,42 milioi eurokoa, eta aholkularitza tekniko espezializatuko programa bat barne hartuko duela, aurrera egitea erabakitzen dutenei laguntzeko.
Jardunaldian ekintzaile gazteek parte hartu dute, eta ziurgabetasun- eta zalantza-egoera berean egon direnez, beren esperientziak partekatu dituzte. Haien historiak eredu izan dira zera erakusteko: posible dela erronkak gainditzea eta helburuak lortzea erabakitasunez eta etengabeko ikaskuntzaz.
