Donostiako ordezkari instituzionalek, herritarrek eta Santiren senitartekoek elkarretaratzea egin dute arratsaldean. Horrela, atsekabea azaldu dute gorrotoa eta xenofobia uxatzeko mezuen artean. 17 urteko adingabea igandean hil zen, zenbait gaztek emandako jipoiaren ondorioz.
Bitartean, zazpi gazte atxilotuak Instrukzio-epaitegian dira. Horietako bat kautelazko neurriekin aske utzi du epaileak dagoeneko. Fatima Hacine-Bacha biktimaren ama gorrotoaren kontra agertu da, eta etorkinak ez kriminalizatzea eskatu du, atxilotuen jatorrian arreta jarri duten mezu xenofoboei erantzunez.
Ama Eneko Goia Donostiako alkatearekin bildu da arratsaldean. Bere semea hil duten gazteek halakorik berriz ez egiteko, «benetako» birgizarteratze neurriak eskatu ditu Hacine-Bachak.
«Oreka bat egon behar da», «izugarrikeria» egin dutenek «ondorioak» izan behar dituzte, amak adierazi duenez. Hala ere, kolektibo batzuk «seinalatu eta iraintzen aritzeak ez du askotarako balio», esan du.
«Jendearen amorrua ulertzen dut, gizakiak garelako, emozionalak, eta batzuetan indargabe sentitzen gara eta hori adierazteko modu bat da, errespetatzen dut», gaineratu du udaletxearen kanpoaldean, bere semeari eraso egin zioten tokitik metro gutxira.
Fatima Hacine-Bachak aita aljeriarra du. Gogorarazi duenez, Santi semeak «mundu osoko lagunak ditu, marokoarrak, aljeriarrak…, Marokoko umezurtz-etxe bat bisitatzera joan zen, eta kontzientzia soziala du, bere anaiaren antzera».
Gazte erasotzaileei «birgizarteratze osasungarri» bat erraztea aldarrikatu du adingabearen amak, «kartzelara doazenean sartu-irtenean ez ibiltzeko, eta hori normalizatzea saihesteko». «Irainak, errespetu faltak etab berriz ez errepikatzea» nahi du, «gerrak gerra dakarrelako», azken egunetako mezu xenofoboak gaitzetsiz.
Bestalde, hezkuntzan aldaketak sartzea eskatu die politikariei, balioak sendotzeko. «Neska-mutikoek zail dute, balio galera oso sakona da», ohartarazi duenez.
Alkatea amarekin bildu ondoren, Donostiako udaletxearen aurrean elkarretaratzea egin dute. 500 bat pertsonak parte hartu dute, horien artean hildakoaren lagunek eta senideek. Guztiek nahigabea agertu dute.
Hildakoaren amak azaldutako «eskuzabaltasun ikaragarria» goraipatu du Goiak; izan ere, «gorrotoaren aurkako mezu bat» zabaldu du. Alkatearen hitzetan, «une honetan oso beharrezkoa da».
Santiri eraso egin zioten gazteen «jokabideetan» arreta jartzea eskatu du alkateak, beste «gauza batzuk» alde batera utziz, atxilotuen jatorriari erreferentzia eginez. Duela hilabete batzuk beste gizon bat hil zuten borroka batean, Donostiako Alde Zaharrean, gogorarazi duenez, «orduan ez genuen pertsona horien jatorriaz hitz egin, bertakoak ez zirenik».
Hildako adingabea Donostia, bertan hazi eta ama bertan bizi delako, eta Reocin (Kantabria) artean bizi zen, aita herri horretan bizi delako. Era berean, Reocingo Udalak elkarretaratzea eta minutu bateko isilunea deitu ditu astelehen honetarako, «eraso basatia» gaitzesteko.
