Ertzaintzak 18 urtetik 26 urtera bitarteko bost gazte atxilotu dituzte gaur goizean Bizkaiako hiriburuan gertaturiko hainbat lapurreta leporatuta.
Lehenengo kasua atzo, osteguna, arratsaldeko lauak aldera gertatu zen Abando auzoan, auto baten jabea TAOko tiketa ateratzera joan zenean autoa aparkatuta eta zabalik utzita. Oinezko batek jakinarazi zion gizonezko bat autoan sartu zela eta hainbat objektu hartuta joan zela. Biktimak berehala deitu zuen Ertzaintzara, eta, lekukoak emandako informazioan oinarrituta, Bilbo Zaharra auzoan aurkitu zuten agenteek ustezko lapurra, 24 urteko gizonezkoa. Arrastatu zuten unean gizonezkoak eskuko ordenagailu bat eta beste hainbat objektu pertsonal zeramatzan, biktimak berreskuratu ahal izan zituenak.
Beste lau pertsonak goizaldean, hiru eta erdietatik bost eta erdiak bitartean, arrastatu ditu Ertzaintzak. Horrela, goizeko hiru eta erdiak aldera, bi gizonezko harrapatu dituzte Begoña auzoko okindegi batean lapurretan. Abisua pertsiana behartuta zegoela eta barruan jendea zebilela ikusi duen oinezko batek eman du. Bertara hurbildu den lehenengo patruilak in fraganti harrapatu ditu lokaleko atea eta makina erregistratzailea behartu dituzten lapurrak, 18 eta 23 urteko bi gizonezko.
Ia ordu berean, lauak laurden gutxian, eta oraingoan ere Begoña auzoan, beste bizilagun batek larrialdietarako telefonora deitu du taberna bateko alarma aktibatu dela eta barruan zaratak entzuten zirela esanez. Adierazitako lekura hurbildu diren agenteek zuhaixka artean ezkutatuta aurkitu dute lapurretako bat, 18 urteko gaztea, lokaletik lapurtu duen kutxa erregistratzailea manipulatzen ari zela. Orain, ustez lapurretan parte hartu duen bigarren gizonezkoa identifikatu eta atxilotu nahian ari dira.
Gaur goizeko bost eta erdietan, emakume batek eskatu du laguntza 112 SOS DEIAK telefono-zenbakiaren bidez, Deustuko Erriberatik oinez zihoala poltsa lapurtu diotela esanez. Biktimak aurre egin dio lapurrari eta honek eraso egin dio ihes egin aurretik. Agenteek emakumea artatu dute, eta, beharrezko datuak bildu ondoren, inguruan aurkitu eta atxilotu dute erasotzailea, 26 urteko gizonezkoa, nahiz eta ordurako poltsa nonbait utzita zuen.
