Ertzainek gizon bat atxilotu zuten atzo, Trapagaraneko industrialde bateko bi enpresatan lapurreta egiten saiatzea leporatuta. Patruila batek harrapatu zuen ustezko lapurra, enpresa batean lapurreta egiten saiatu ondoren bigarrenera sartzeko eskalatzen ari zenean.
Lehenengo lapurreta atzo arratsaldeko lauak eta hamarrean egin zuen Bizkaiko Trapagaran herriko industrialde bateko enpresa batean. Enpresako segurtasun-langileek ohartarazi zuten ustez lapurreta egin zutela bertako instalazioetan.
Adierazitako lekura hurbildu zen patruilak irekita aurkitu zuen pabiloietako batera sartzeko ate handia, eta segurtasun-langileekin harremanetan jarri zen. Jagoleak eskuan giltza ingeles bat zuen gizon bat ikusi zuen kamioi baten kaxaren gainean. Jagolea ikustean, instalazioak inguratzen dituen hesiaren gainetik jauzi eginda ihes egin zuen gizonak. Susmagarriaren deskribapena eman ondoren, patruila bere bila hasi zen.
Handik laster, inguruak miatzen ari zirela, agenteek gizon bat ikusi zuten aldameneko enpresa batera sartu nahian. Gizonak horma eskalatu zuen panel batzuk behartzeko asmoz.
Ertzainek identifikatu egin zuten susmagarria, eta, ondoren, arrastatu egin zuten bere deskribapen fisikoa ustezko lapurrarenarekin bat zetorrela egiaztatu zutenean. Polizia-aurrekariak dituen atxilotua, 46 urtekoa, Ertzaintzaren egoitzara eraman zuten dagozkion izapideak egitera. Horiek amaitu ondoren, datozen orduotan eramango dute epaitegira.
