Ertzainek 37, 38 eta 42 urteko hiru gizon atxilotu zituzten atzo Hondarribian etxe batean indarrez sartzea leporatuta, eta 40 urteko emakume bat ikerketapean geratu zen.
Atzo goizeko hamar eta erdiak aldera, Hondarribian Ertzaintzaren herritarren segurtasunerako patruila baten laguntza eskatu zuten, salaketa baten arabera bertako etxe bat legez kontra okupatu zutela eta.
Ertzainak berehala hurbildu ziren adierazitako lekura, eta gertaeraren inguruabarrak aztertu ondoren, etxean sartzea erabaki zuten eta barruan hiru gizon eta emakume bat aurkitu zituzten.
Horren aurrean, patruilako kideek hiru gizonak atxilotu zituzten eta emakumea ikerketapean geratu zen etxe batean indarrez sartzea leporatuta.
Bestalde, pertsonak identifikatzen ari zirenean, agenteak konturatu ziren 38 urteko gizonak emakumearengandik aldentzeko agindu bat zuela indarrean, eta kondena urratzearen ustezko delitua ere leporatu zioten, beraz.
Salaketan jasota dagoenez, hainbat egun lehenago etxeko ate nagusiak, lorategiko hesiak eta garajetik sartzeko ateak behartu izanaren zantzuak zituzten.
Hiru atxilotuek polizia-aurrekariak dituzte, eta goizean eramango dituzte agintari judizialarengana Irungo Guardiako Epaitegian.
